काठमाडौँ। नेकपा एमालेको विधान महाधिवेशनको तेस्रो दिन आज अध्यक्ष केपी शर्मा ओली लगायत तीन नेताले प्रतिनिधिले उठाएको प्रश्नमा जवाफ दिँदैछन् ।
महाधिवेशनमा अध्यक्ष ओलीले प्रस्तुत गरेको राजनीतिक प्रतिवेदन, महासचिव ईश्वर पोखरेलको संगठनात्मक प्रतिवेदन र उपमहासचिव विष्णु पौडेलको विधान संशोधन प्रस्तावमाथि आएका सुझाव र प्रश्नको तीनै जना नेताहरुले जवाफ दिने कार्यक्रम रहेको विधान महाधिवेशन व्यवस्थापन समितिका सचिव शेरबहादुर तामाङले बताए ।
विहान ८ बजेबाट तेस्रो दिनको प्लेनरी बोलाइएको छ । आज पाँच वटा समूह छलफलको निष्कर्ष प्रस्तुत गर्ने कार्यक्रम छ । तीन वटै दस्तावेजमाथि छलफलको लागि १० वटा समूह बनाएकोमा पाँच वटा समूहले शनिबार नै निष्कर्ष र सुझाव प्रस्तुत गरिसकेको छ ।
आज प्रदेश १, प्रदेश २, गण्डकी प्रदेश, जनसंगठन प्रदेश र विशेष समूहको छलफलको निश्कर्ष महाधिवेशन हलमा प्रस्तुत गर्ने कार्यक्रम
छ ।
सबै समूहले छलफलको निष्कर्ष र सुझाव प्रस्तुत गरेपछि अध्यक्ष ओली, महासचिव पोखरेल र उपमहासचिव पौडेलले सहभागीले उठाएका प्रश्नको जवाफ दिने कार्यक्रम रहेको तामाङले बताए ।
त्यसपछि तीन वटै दस्तावेज पारित गरेर आज विधान महाधिवेशन समापन हुने उनले बताए ।
