बाँके\सर्लाहीको हरिवनस्थित इन्दुशङ्कर चिनी उद्योग यो वर्ष २४ लाख क्विन्टल उखु क्रसिङ गरेर बन्द भएको छ ।२४ लाख १३ हजार क्विन्टल उखु क्रसिङ गरी यो सिजनका लागि मिल बन्द गरिएको उद्योगका उखु प्रबन्धक योगनारायण रजकले जानकारी दिए ।  उद्योगले  यो  वर्ष  २५  लाख  क्विन्टल  उखु  क्रसिङ गर्ने  लक्ष्य लिएको भए पनि उखु अभावका कारण लक्ष्य पूरा गर्न सकेन ।

उखु प्रबन्धक रजकका अनुसार उद्योगले फागुन १० गतेसम्म किसानबाट खरिद गरेको उखुको  करिव  ८०  करोड  रुपियाँ  भुक्तानीसमेत  गरिसकेको  छ ।  बाँकी किसानको पनि क्रमैसँग भुक्तानी गर्दै जाने उद्योगले जनाएको छ ।सर्लाहीका  तीनवटा  चिनी  उद्योगमध्ये  महालक्ष्मी  चिनी  उद्योग, बगदह र अन्नपूर्ण चिनी उद्योग, धनकौल यसअघि नै बन्द भइसकेका छन् ।

महालक्ष्मीले यो वर्ष आठ लाख ३८ हजार क्विन्टल र गत वर्ष बन्द भएर यो वर्षदेखि पुनः सञ्चालनमा आएको अन्नपूर्णले ४० हजार क्विन्टल उखु क्रसिङ गरेर बन्द भएका हुन् ।  भुक्तानी  लिन  झन्झट  बेहार्नुपर्ने  र  रकम  लिनै  नसकेकोजस्ता समस्याले गर्दा किसानले उखु खेती कम गर्दै लगेपछि चिनी उद्योगलाई पर्याप्त उखु उत्पादन हुन नसकेको हो । पछिल्ला वर्षहरूमा उखु नपाएर चिनी उद्योगहरू छोटो समय सञ्चालन भएर बन्द हुने गरेका छन् ।  गोरखापत्र दैनिकमा खबर छ ।