काठमाडौँ– प्रधानमन्त्री पुष्पकमल दाहाल ‘प्रचण्ड’ले पदभार ग्रहण गरेका छन्।
सोमबार (आज) अपराह्न ४ बजे राष्ट्रपति विद्यादेवी भण्डारीबाट पद तथा गोपनियताको शपथ लिएका उनले सिंहदरबारस्थित प्रधानमन्त्री तथा मन्त्रिपरिषद्को कार्यालय पुगेर पदभार ग्रहण गरेका हुन्।
सो क्रममा उनले संविधानको अधिनमा रहेर देश र जनताको विकासका लागि महत्त्वपूर्ण काम गर्ने बताएका छन्। प्रधानमन्त्रीका रूपमा प्रचण्डको यो तेस्रो कार्यकाल हो। यसअघि उनी दुईपटक ९/९ महिना प्रधानमन्त्री बनेका थिए।
उनलाई नेकपा एमालेसहित ७ वटा राजनीतिक दलका १ सय ६९ सांसदको समर्थन छ। संविधानको धारा ७६ (२) अनुसार आइतबार राष्ट्रपतिबाट प्रचण्ड प्रधानमन्त्रीमा नियुक्त भएका हुन्।
