बुटवल\नेकपा एमालेका उपाध्यक्ष एवम् पूर्वअर्थमन्त्री विष्णु पौडेलले अर्थतन्त्र सुधारका लागि फजुल खर्च कटौती गर्नुपर्ने बताएका छन्। बुटवलमा शनिबार (आज)देखि सुरु राष्ट्रिय पार्क सम्मेलनको उद्घाटन गर्दै उनले यस्तो बताएका हुन्।
फजुल खर्च कटौतीका लागि सरकारले सबै दल र विज्ञसँग छलफल गरी राजस्वले चालु खर्च धान्न सक्ने बजेट निर्माण गर्न उनले सुझाव दिए।
कानुनको अभावमा सामुदायिक वनभित्र सञ्चालित पार्कले समस्या र द्वन्द्व झेल्नुपरेको बताउँदै उनले सरकारले कानुन बनाएर वैज्ञानिक ढंगले दिगो व्यवस्थापनको बाटो खोल्नुपर्ने उल्लेख गरे।
पार्कहरूको विशिष्टीकरण र वर्गीकरण आवश्यक रहेको बताउँदै सरकारले कानुन निर्माणमा बेवास्ता गरे निजी क्षेत्रबाट गैरसरकारी विधेयक दर्ता गरेर पनि कानुन बनाउन सकिने उनको भनाइ छ। सम्मेलनमा लुम्बिनी प्रदेशका पूर्वमुख्यमन्त्री लीला गिरीले धेरैजसो पार्कहरू वन क्षेत्रभित्र सञ्चालनमा रहेकाले बेला-बेलामा वनसँग हुने विवाद र द्वन्द्व अन्त्यका लागि स्पष्ट कानुन बनाउन दबाब दिनुपर्ने बताए।
कार्यक्रममा बागमती प्रदेशका पूर्वमुख्यमन्त्री डोरमणि पौडेल, बुटवल उपमहानगरपालिकाका मेयर खेलराज पाण्डे, बुटवल उद्योग वाणिज्य संघका अध्यक्ष उज्ज्वल कसजूलगायतले देसभरका पार्कहरूको सही ढंगले व्यवस्थापन गर्ने विषयमा सम्मेलन उपलब्धिमूलक हुने विश्वास व्यक्त गरे।
सम्मेलनमा पार्क व्यवस्थापनमा नीतिगत समस्या र कानुनी जटिलताका विषयमा संविधानविद् काशीराज दाहाल र पत्रकार डीआर घिमिरेले छुट्टाछुट्टै कार्यपत्र प्रस्तुत गरे। सम्मेलनमा समुदायबाट सञ्चालित पार्कलाई लगाइएको मूल्यअभिवृद्धि कर, उपभोक्ता समितिबाट हुने निर्माणका सम्बन्धमा रहेका जटिलताका विषयमा पनि छलफल गरी आइतबार बुटवल घोषणपत्रसमेत जारी गर्ने सम्मेलनका सदस्यसचिव अनन्त सिलवालले जानकारी दिए।
सम्मेलन बुटवलको मणिमुकुन्दसेन उद्यान र तिलोत्तमाको शंकरनगर वन विहार तथा अनुसन्धान केन्द्र (वनवाटिका)को आयोजनामा सुरु भएको हो।
