विशेष समयमा बोल्दै प्रदेश सभा सदस्य तुलसीप्रसाद चौधरीले मुख्यमन्त्रीले सदनलाई बेवास्ता गरेको बताउँदै बजेट पास गर्ने समय र विश्वासको मत लिने समयमा बाहेक सदनमा देख्नै नपाएको बताए ।

‘गौतमबुद्ध अन्तर्राष्ट्रिय विमानस्थल निर्माण भएर तयार छ । तर, विमानस्थल बन्द छ । विमानस्थल बन्द हुँदा नीजि क्षेत्रबाट अर्र्बौ लगानी गरेर निर्माण गरेका होटल व्यवसायमा लगाएको लगानी डुब्ने अवस्थामा पुगेको भन्दै केन्द्र सरकारसंग जवाफ माग्नुपर्ने छ तर मुख्यमन्त्री हुनुहुन्न ।’, उनले भने, ‘नागरिकका समस्या उस्तै छन्, उत्पादन बढाउन समयमा बीउ, समयमा मल खाद र समयमा सिंचाईको व्यवस्था मिलाउनुपर्ने तर, सरकारको ध्यान पुग्न सकेको छैन, प्रदेश सरकारका योजना कार्यान्वयन भएपनि भुक्तानी नपाएको गुनासो बढेको छ, यसमा मुख्यमन्त्री र मन्त्रीको गम्भीर ध्यानआकृष्ट होस्’, उनले भने ।

चौधरीले सदनमा सांसदहरुले उठाएका गम्भीर सरोकारका विषय मन्त्रीहरुले निश्चित समयभित्र दिनुपर्ने नियम अहिले पूरै उल्लंघन भएको आरोप लगाए ।सांसद डिल्लीराज भुसालले मुख्यमन्त्रीलाई सदन र कार्यालयमै भेट्न समस्या भएको बताए ।

‘हामीले मतदातालाई विभिन्न वाचा गरेका छौं, गाउँमा जाँदा ती विषय केही सम्बोधन भएका छैनन्, मुख्यमन्त्री सदनमा आउनुहुन्न, कार्यालयमा पनि भेट्न सकिन्छ, हामीले त यस्तो समस्या भोगेका छौं, अरुलाई कति सास्ती होला ?’, भुसालले भने । केही मतदातालाई लिएर नै धेरैपटक मुख्यमन्त्री भेटन गएको तर नसकेको भन्दै यस्तो गैरजिम्मेवारी नबन्न सभामुखमार्फत भुसालले मुख्यमन्त्रीलाई आग्रह गरेका थिए ।

प्रदेश सभा सदस्य जन्मजय तिमिल्सिनाले प्रदेशका साझा समस्या समाधान गर्न सामुहिक एजेण्डा बनाउनुपर्ने बताएका छन् । गौतमबुद्ध विमानस्थल सुचारु गर्न सामुहिक साझा एजेण्डा बनाउनुपर्ने बताएका हुन् । मुख्यमन्त्री भारत भ्रमणमा रहेकाले त्यहाँ विमानस्थल सञ्चालनको बिषयमा भारत सरकारसंग पनि कुरा हुने उनले विश्वास व्यक्त गरे ।

बैठकमा प्रदेश सभा सदस्य कृष्णाकुस्मा थारुले मालपोत र नापी कार्यालयमा भ्रष्टाचार बढी हुने कार्यालयको रुपमा परिचित भएको गुनासो आएको बताइन् । सरकारले भ्रष्टाचाररहित कार्यालय बनाउन निर्देशन दिन माग गरिन् ।

प्रदेशको औचित्य पुष्टि गर्न जनतामा सकारात्मक सन्देश दिनुपर्ने बताइन् । प्रदेश सभा सदस्य दिनेश पन्थीले विद्युतीय सवारी साधन सञ्चालनमा उत्साह थप्नुपर्ने बताएका छन् । सरकारले विद्युतीय सवारी साधन सञ्चालनका लागि सरकारले पूर्वाधार निर्माणमा ध्यान दिन आग्रह गरेका छन् ।

प्रदेश सभा सदस्य निर्मलाकुमारी थारुले निर्वाचनमा गरेको प्रतिबद्धता अनुसार कृषि क्षेत्रमा लगानी हुन नसकेको बताइन् । किसानहरुको समस्या समाधान गर्न सरकारले नसकेको बताइएकी हुन् । प्रदेश सभा सदस्य मिनाकुमारी श्रेष्ठले शहर बजारमा स्वच्छ सफा खानेपानी नभएको भन्दै व्यवस्था मिलाउन सरकारसँग माग गरिन् । सडक यातायातको विस्तार गाउँ गाउँमा विस्तार गर्न नसकिएको भन्दै सरकारको ध्यानाकर्षण गराएकी हुन् ।

एक विधेयक समितिमा एक विधेयक सभामा प्रस्तुत

प्रदेश सभाले औद्योगिक व्यवसाय सम्वन्धि प्रचलित प्रदेश कानुन संशोधन र एकीकरण गर्न बनेको विधेयकलाई दफावार छलफलका लागि अर्थ, उद्योग तथा पर्यटन समितिमा पठाएको छ ।

दोस्रो अधिवेसनको २२ औं बैठकमा मुख्यमन्त्री एवम् उद्योग, पर्यटन तथा यातायात व्यवस्था मन्त्रीको प्रतिनिधिको रुपमा गृहमन्त्री सन्तोषकुमार पाण्डेले औद्योगिक व्यवसाय सम्बन्धी प्रचलित प्रदेश कानुन संशोधन र एकीकरण गर्न बनेको विधेयकलाई दफावार छलफलका लागि सम्वन्धित समितिमा पठाइयोस् भन्ने प्रस्ताव प्रस्तुत गरेका थिए । सभामुख तुलाराम घर्तीले उक्त प्रस्ताव निर्णयार्थ प्रस्तुत गरेका थिए ।

सभाले उक्त प्रस्ताव दफावार छलफलका लागि अर्थ, उद्योग तथा पर्यटन समितिमा पठाइयोस भन्ने प्रस्ताव सर्वसम्मितले स्वीकृत भएको घोषणा गरे । यस्तै बैठकमा सामाजिक विकास समितिका सदस्य धनबहादुर केसीले स्वास्थ्य संस्था स्थापना, संचालन, नवीकरण तथा स्तरोन्नति ऐन, २०७६ लाई संशाधन गर्न बनेको प्रतिवेदन सहितको विधेयक सभामा प्रस्तुत गरेका थिए ।

दोस्रो अधिवेशनको २३ औं बैठक शुक्रबार बस्नेछ । शुक्रबारको २३ औं बैठकमा प्रदेश निजामती सेवाको गठन, संचालन र सेवाको शर्त सम्बन्धमा व्यवस्थापन गर्न बनेको विद्येयकलाइृ दफावार छलफलका लागि सम्बन्धित समितिमा पठाइने, र स्वास्थ्य संस्था स्थापना, संचालन, नवीकरण तथा स्तरोन्नति ऐन ०७६ लाई शंशोधन गर्न बनेको विद्येयकमाथि छलफल गरी पारित गर्ने कार्यसूचि रहेको छ ।