कोहलपुर,बाँके: सोमवार कोहलपुर क्रिकेट मैदानमा भएको खेलमा  कञ्चनपुर नेत्रहीन राष्ट्रिय क्रिकेट प्रतियोगिताको फाइनलमा प्रवेश गरेको छ । लुम्बिनीलाई ७ विकेटले हराउँदै कञ्चनपुरले फाइनल यात्रा तय गरेको हो । अब फाइनलमा बर्दिया र कञ्चनपुर भिड्नेछन् । फाईनल खेल कोहलपुर क्रिकेट मैदानमा आज मंगलवार हुने आयोजक नेत्रहीन क्रिकेट संघ नेपालले न्युज मानसरोवरलाई जानकारी दिएको छ ।

नेत्रहीन क्रिकेट संघ नेपालको आयोजनामा बाँकेको कोहलपुरमा जारी नेत्रहीन राष्ट्रिय क्रिकेट प्रतियोगिता अन्तर्गत सोमवार भएको दोस्रो सेमिफाइनल खेलमा लुम्बिनीले टस जितेर व्याटिङ्ग रोजेको थियो । लुम्बिनीले ६ विकेटको क्षतिमा १९२ रन बनाएको थियो । कञ्चनपुरले जबाफी व्याटिङ्ग गर्दै १८.२ ओभरमै ३ विकेटको क्षतिमा लक्ष्य पूरा गरेको थियो ।

प्लेयर अफ द म्याच कञ्चनपुरका पदम बहादुर बडौला भए । यसअघि भएको पहिलो सेमिफाइनल खेलमा कर्णालीलाई ६ विकेटले पराजित गर्दै बर्दियाले फाइनल यात्रा तय गरेको थियो ।