कोहलपुर,बाँके: कतारका अमिर राजा शेख तमिम बिन हमाद अल थानीको भ्रमणका लागि नेपालमा उच्च तयारी गरिएको छ। आज मंगलबार उनी नेपालको औपचारिक भ्रमणमा आउँदैछन्।
उनको भ्रमणलाई सफल बनाउन सरकारी संयन्त्रहरुले तयारी तीव्र पारेका छन्। आज साँझ काठमाडौँ टेक्ने उनलाई सरकारले हात्ती उपहार दिनेदेखि देशैभर सार्वजनिक बिदा दिने निर्णय गरेको छ।
कूटनीतिक सम्बन्ध स्थापना भएको ४७ वर्षपछि कतारबाट पहिलो पटक हुन लागेको उच्चस्तरीय भ्रमणलाई सरकारले उच्च प्राथमिकता दिँदै भोलि सार्वजनिक बिदा दिने निर्णय गरेको हो। बैशाख ११ लाई लोकतन्त्र दिवसको रुपमा मनाउदै आएको सरकारले विदा दिने प्रचलन हटाएपनि विदेशि पाहुनाको सम्मानमा सार्वजनिक विदा दिने निर्णय गरको हो ।
कतारी राजा थानीको सुरक्षाको जिम्मा नेपाली सेनालाई दिइएको र अरु घेरामा अन्य सुरक्षाकर्मी रहने छन्। कतारी राजालाई राष्ट्रपति रामचन्द्र पौडेलले त्रिभुवन अन्तर्राष्ट्रिय विमानस्थलमै गएर स्वागत गर्ने कार्यक्रम तय भएको छ।
नेपाल आएलगत्तै कतारका राजा राष्ट्रपति कार्यालय शीतलनिवास जाने कार्यक्रम रहेको छ। शीतलनिवासमा राष्ट्रपति पौडेल र कतारका अमिरबीच नेपाल–कतार द्विपक्षीय सम्बन्धमा छलफल हुनेछ।
राष्ट्रपति पौडेलले कतारी राजा थानीको स्वागतमा बेलुका रात्रिभोजको आयोजना गर्दैछन्। भोलि प्रधानमन्त्री पुष्पकमल दाहाल प्रचण्ड र कतारी राजाबीच द्विपक्षीय वार्ता हुनेछ। कतारी राजाको राजकीय भ्रमणका क्रममा विभिन्न सम्झौता हुने सरकारकी प्रवक्ता रेखा शर्माले जानकारी दिएकी छिन्।
