तुलसीपुर:  नेपाली सेनाका एक जवान आफ्नै श्रीमतीको हत्या गरेको आरोपमा पक्राउ परेका छन् । दाङको तुलसीपुर उपहानगरपालिका-६ लुङ्ग्री टोलमा बस्ने ३६ बर्षीय शालिकराम बुढाथोकीले २७ बर्षीया  श्रीमती टीका बुढाथोकीको खुकुरी प्रहार गरी हत्यापछि खुकुुरीसहित फरार भएकै अवस्थामा खुकुरीसहित पक्राउ परेका छन् ।

आज बिहान सवा ८ बजेतिर बुढाथोकी श्रीमतीको हत्यापछि सोही खुकुरी लिएर फरार थिए । इलाका प्रहरी कार्यालय तुलसीपुरका प्रबक्ता प्रहरी निरीक्षक प्रकाश थापाले आज बिहान सवा ८ बजेतिर श्रीमतीको हत्यापछि आरोपित ब्यक्ति खुकुरी हातमा समाएर गएको भन्ने सूचनाका आधारमा प्रहरीले उनलाई नियन्त्रणमा लिएको छ । श्रीमतीले बिवाहेत्तर सम्बन्ध राखेका कारण आवेगमा आएर श्रीमतीको हत्या गरेको प्रहरी समक्ष आरोपितले बयान गरेका छन् ।

आफ्नै आर्मी साथीसंग लसपसका कारण आफूले श्रीमतीको हत्या गरेको उनले बताएको एक प्रहरी अधिकारीले बताए । घटनाबारे थप अनुसन्धान हुन बाँकी रहेको पनि प्रहरीले जानकारी दिएको छ ।