नेपालगन्ज : होटल सिद्धार्थ नेपालगजले पहिलो पटक ‘रन फर बेटर हेल्थ’ स्लोगनसहित ‘रोड रेस’ गर्ने भएको छ । नेपालगन्जमा आज बिहीबार बिहान  उक्त कार्यक्रम गर्न लागेको हो । रोड रेसको सुरुवात सिद्धार्थ कटेज धम्बोझीदेखी होटल सिद्धार्थ कारकाँदोमा पुगेर समापन हुनेछ ।

होटल सिद्धार्थले कर्मचारीहरुको प्रत्येक हप्ता उइक्ली बोस्टर भन्ने विभिन्न किसिमका क्रियाकलापहरु गर्दै आएको छ । त्यसै अन्तरगत यसपाली अलि भिन्नै किसीमले रन फर बेटर हेल्थ भन्ने रोड रेस गराउन लागिएको होटल सिद्धार्थले जनाएको छ । उक्त कार्यक्रममा होटल सिद्धार्थ कारकाँदो, सिद्धार्थ कटेज धम्बोझी र ज्याकपट क्यासिनोको सहकार्यमा हुन लागेको बताइएको छ ।

यसका लागि होटल सिद्धार्थ कारकाँदोबाट १ सय १० जना कर्मचारी, सिद्धार्थ कटेजबाट ४५ जनाकर्मचारी, ज्याकपट क्यासीनोबाट ५५ जना कर्मचारी र अन्य सरोकारवाला गरेर २ सय ५० जना सहभागी रहने सिद्धार्थ विजनेस ग्रुपअफ हस्पिटालिटीका क्षेत्रीय कार्यकारी निर्देशक केशव न्यौपानेले जानकारी दिए ।

लामो समयदेखि हस्पिटालिटी क्षेत्रमा सेवा दिँदै आएको सिद्धार्थ बिजनेस ग्रुप अन्तरगत मुलुकभर जम्मा ३४ वटा होटल, रिसोर्ट, क्याफे, ट्राभल लगायत सञ्चालनमा रहेका छन् ।