काठमाण्डौ:राष्ट्रिय स्वतन्त्र पार्टी (रास्वपा) का सभापति रवि लामिछानेविरुद्ध सहकारी ठगी, संगठित अपराध र सम्पत्ति शुद्धीकरणको मुद्दा चलाउने तयारी भएको छ । पाँच जिल्लाबाट मुद्दा चल्ने भए पनि सबैभन्दा पहिला कास्की जिल्ला अदालतमा मुद्दा दायर हुँदैछ ।  उनका विरूद्धमा सहकारी ठगी र संगठित अपराधमा भन्दा बलियो मुद्दा सम्पत्ति शुद्धीकरणको अभियोगमा हुने भएको छ । किनभने, प्रहरीले रवि र उनकी श्रीमतीको खातामा २१ करोड रूपैयाँ गैरकानुनी स्रोतबाट जम्मा भएको फेला पारेको छ ।

रवि र निकिताको बैंक खातामा अस्वाभाविक कारोबार देखिएको कारण यही मुद्दाले रविको राजनीतिक भविष्यमा ठूलै धक्का लाग्ने देखिएको अनुसन्धान अधिकारीहरू बताउँछन् । स्रोतअनुसार, पछिल्लो ४ वर्षमा ग्लोबल आईएमई र सिद्धार्थ बैंकमा रहेको रविको खाता तथा नेपाल बैंक र सिद्धार्थ बैंकमा रहेको निकिताको खातामा कुल २१ करोड ४० लाख ४२ हजार रूपैयाँबरबारको कारोबार देखिएको छ ।
यति ठूलो परिमाणमा रकम कहाँबाट आयो र कहाँ गयो भन्ने तथ्य रविले अहिलेसम्म देखाउन सकेका छैनन् । कास्की प्रहरीले जिल्ला सरकारी वकिलमार्फत पुस ५ गतेभित्र जिल्ला अदालत कास्कीमा मुद्दा दायर तयारी अघि बढाएको छ । रविका व्यावसायिक साझेदार छविलाल जोशी गत असोज ६ गते पक्राउ परेकाले त्यही दिनबाट गणना गरी ९० दिन हिरासतमा राख्न पाउने प्रकृतिको म्याद अदालतले दिइरहेको छ । सम्पत्ति शुद्धीकरणसम्बन्धी कसुरमा अनुसन्धान गर्दा ९० दिनभित्र मुद्दा अदालतमा दायर गर्नुपर्ने कानुनी बाध्यता छ ।

हुन त रविसहित संलग्न गोरखा मिडियामा गैरकानुनी तवरले विभिन्न सहकारीको ६८ करोड रूपैयाँ परिचालन गरी डुबाइएको छ । यसका मुख्य योजनाकारका रूपमा प्रहरीले जीबी राई, रवि लामिछाने, छविलाल बन्जाडे र कुमार रम्तेललाई पहिचान गरेको छ । उनीहरू मिलेर नियोजित रूपमा सहकारीको रकम ठगेको भन्दै प्रहरीले संगठित अपराधमा मुद्दा चलाउन लागेको छ । उनीहरूमध्ये कसले कति रकम अपचलन गरे भन्ने पनि सर्भरले खुलाएको छ । उक्त सर्भर बन्जाडेको बुद्धनगरस्थित घरबाट बरामद गरिएको थियो ।

अनुसन्धानमा संलग्न स्रोतका अनुसार स्वर्णलक्ष्मी, सहारा, सुप्रिम, सूर्यदर्शन र सानोपाइला सहकारीबाट गोरखा मिडियामा पुगेको करोडौं रकम परिचालनको अधिकार पाएका रविले श्रीमती निकिता पौडेलको बैंक खातामा ३५ लाख रुपैयाँ जम्मा गरेको भेटिएको छ ।

रविले निकिताको नाममा गोरखा मिडियाको नामको चेक काटेर दिएको पनि प्रमाण भेएको छ । गोरखा मिडियाबाटै रविले ससुरा उद्धव पौडेलको स्वामित्व रहेको गोपीकृष्ण मुभिजको नाममा २५ लाखको चेक काटेको भेटिएको छ । जबकि गोरखा मिडियामा उनीहरूको कुनै सम्बन्ध थिएन । सहकारी ठगी छानबिन गर्न बनेको संसदीय विशेष समितिले सहकारीबाट गोरखा मिडियामा पुगेको ६५ करोड ५४ लाख रुपैयाँ गएको देखाए पनि प्रहरी अनुसन्धानका क्रममा थप ३ करोड बढी गोरखा मिडियामा पुगेको फेला परेको छ ।

यस प्रकरणका ५ अभियुक्त अहिले हिरासतमै छन् । कुमार रम्तेलविरूद्ध यसअघि नै मुद्दा दायर भएकाले उनी पुर्पक्षका लागि थुनामा छन् । तीबाहेक करिब ३५ जना अझै फरार छन् । मुख्य अभियुक्त जीबी राइ पनि फरार नै छन् । यसबीचमा रवि आफै गृहमन्त्री भए पनि जीबी राईलाई नझिकाएर मुद्दाको अनुसन्धानमा वास्ता नगरेको आरोप लागेको थियो । त्यस्तै उनले आफूविरुद्धको अनुसन्धान दबाउन विभिन्न प्रहरी अधिकारीको सरुवा गरेका थिए ।

सीआईबी प्रमुख किरण वज्राचार्यलाई सरुवा गरेर श्याम ज्ञवालीलाई सीआईबी प्रमुख बनाएका थिए । त्यस्तै रविले प्रहरी महानिरीक्षकलाई संसदीय समितिमा आफूविरुद्ध कुनै जाहेरी नरहेको र सहकारी ठगीको प्रमाण पनि नभएको भनेर बोल्न लगाएका थिए । तत्कालीन महान्यायाधिवक्ता दीनबन्धु पोखरेललाई क्लिन चिट पाएको पत्र लेख्न लगाएका थिए । बुटवलको सुप्रिम सहकारीबाट २ करोडभन्दा बढी रकम प्रत्यक्ष रुपमा रविले आफै बुझेको विवरण फेला परे पनि उनलाई प्रहरीले न विपक्षी कायम गरेको थियो न त सामान्य सोधपुछ नै गरेको थियो । सहारा सहकारीबाट पनि ठूलो रकम रवि संलग्न कम्पनीमा गएको भए पनि प्रहरीले त्यसतिर कुनै अनुसन्धान नै नगरी आवश्यक कागजात विभिन्न निकायले नदिएको भनी पन्छिँदै रविलाई उम्काएको थियो । सरकारी वकिलले नै उनीमाथि छानबिन हुनुपर्ने भनी त्यसबेलै टिप्पणी लेखेको थियो ।

सहकारीको अर्बौँ रकम पचाउन राजनीतिको बर्को ओढ्न खोजे पनि शक्तिको आडमा अनुसन्धान दबाउन खोजे पनि अन्त्ततः रवि फन्दामा परेका छन् । अब उनी यसबाट उम्किन मुस्किल हुँदै गएको छ ।