नेपालगञ्ज : स्वास्थ्य तथा जनसंख्यामन्त्री प्रदीप पौडेलले सिकलसेल एनिमियाका बिरामीलाई आवश्यक पर्ने औषधि सरकारले निःशुल्क उपलब्ध गराउने प्रतिवद्धता जनाएका छन् । नेपालगञ्जस्थित भेरी अस्पतालको नवनिर्मित भवनमा हमोग्लोप्याथी वार्ड र अप्रेशन थियटरको सोमवार उदघाटन गर्दै मन्त्री पौडेलले सिकलसेलका बिरामीलाई निःशुल्क औषधि उपलब्ध गराउने गरी सरकार लागि परेको बताए । उनले त्यसका लागि भारतले सहयोग गर्न लागेको जानकारी दिए ।
‘आफु भारत भ्रमणका क्रममा भारतीय समकक्षीसँग सिकलसेलका बिरामीका लागि आवश्यक पर्ने औषधि सहयोगका लागि प्रस्ताव गरेको र भारतीय समकक्षीले सकारात्मक जवाफ दिएको बताउँदै उनले भने–‘प्रक्रियागत हिसावले विषयगत मन्त्रालयसँगको सहकार्यमा तत्काल औषधि उपलब्धताको प्रतिबद्धता आएको छ । आशा गरौं तत्काल औषधि प्राप्त हुनेछ ।’ उनले आफु निरन्तर संवाद र सम्पर्कमा रहेकाले भारतले खरिद प्रक्रिया पूरा गरेर नेपालमा औषधि उपलब्ध गराउने विश्वास दिलाए ।
उनले सिकलसेलका बिरामीका लागि आवश्यक पर्ने औषधि सिकलसेल डे केयर वार्ड सञ्चालनमा रहेका अस्पतालहरुलाई सरकारले उपलब्ध गराउने र त्यहीबाट बिरामीहरुले सहज तरिकाले औषधि प्राप्त गर्ने मन्त्री पौडेलको भनाइ छ । प्रादेशिक अस्पतालहरुमा सिकलसेलका बिरामीलाई लक्षित गरी डे केयर वार्ड सञ्चालनका लागि सरकारले काम गरिरहेको उनले बताए ।
उनले अव छिट्टै बर्दिया अस्पताल, कैलालीको टीकापुर अस्पताल र कञ्चनपुरको महाकाली अस्पतालमा पनि सिकलसेलका बिरामीलाई लक्षित गरेर डे केयर वार्ड सञ्चालन गरिने बताए । उनले सिकलसेल एनिमिया पुस्तान्तरण हुन नदिन बच्चा जन्मने वित्तिकै स्क्रिनिङ गर्ने गरी मन्त्रालयले योजना बनाउने विश्वास दिलाए ।
अहिलेसम्म उपचारात्मक क्षेत्रलाई मात्रै प्राथमिकता दिएर सरकारले काम गर्दै आएको उल्लेख गर्दै उनले अव निरोधात्मक कार्यक्रमलाई पनि सरकारले प्राथमिकता दिएको बताए । ‘रोग लागेपछि त्यसको उपचार गर्ने सरकारको दायित्व त छदैछ उनले भने–‘अव रोग लाग्नै नदिने गरी सचेतनाका कार्यक्रमहरुलाई पनि सरकारले जोड दिन्छ ।’
अस्पताल विकास समितिका अध्यक्ष विरेन्द्र बहादुर शाहको अध्यक्षतामा भएको कार्यक्रममा अस्पतालका प्रमुख मेसु डा.निराजन सुवेदीले अस्पतालले गरेका प्रगति र चुनौति तथा प्रमुख कन्सल्टेन्ट फिजिसियन डा.राजन पाण्डेले सिकलसेल एनिमिया र थालेसिमिया रोगको अवस्था, उपचार र निदानका सवालमा भइरहेका कामहरु समेटिएको छुट्टाछुट्टै कार्यपत्र प्रस्तुत गरेका थिए ।
