राप्ती सोनारी,बाँके : १८ औं राष्ट्रपति रनिङशिल्ड छनोट प्रतियोगिता तथा आठौं राप्ती सोनारी गाउँपालिका अध्यक्ष कप खेलकुद प्रतियोगिता अर्को वर्ष अमर ज्योति माध्यामिक बिद्यालय फत्तेपुरमा हुने भएको छ ।
राप्ती सोनारी गाउँपालिका वडा नम्बर ८ पेरानीमा रहेको शिव शक्ति माध्यामिक बिद्यालयमा हालै सम्पन्न भएको रनिङ शिल्ड प्रतियोगितामा अमरज्योतिलाई ओलम्पिक झण्डा हस्तान्तरण गरिएको थियो । राप्ती सोनारी गाउँपालिका वडा नम्बर ७ मा रहेको अमर ज्योति माविले अर्को वर्ष १८ औं राष्ट्रपति रनिङशिल्ड छनोट प्रतियोगिता तथा आठौं राप्ती सोनारी गाउँपालिका अध्यक्ष कप खेलकुद प्रतियोगिता सम्पन्न गर्ने गरी जिम्मेवारी दिइएको हो ।
आगामी वर्ष प्रतियोगितालाई भब्य र सभ्य तरिकाले सम्पन्न गर्ने गरी जिम्मेवारी पाएको राप्ती सोनारी गाउँपालिका वडा नम्बर ७ का वडाअध्यक्ष रामलखन थारुले बताए । ‘आगामी वर्षको प्रतियोगिता सञ्चालन गर्ने जिम्मा हाम्रो वडामा रहेको अमरज्योति माविले पाएको छ, प्रतियोगितालाई ब्यवस्थित रुपले सम्पन्न गर्न सबै वडाबासीको ध्यान केन्द्रित हुनेछ,’ उनले भने ।
बिद्यालय ब्यवस्थापन समितिका अध्यक्ष दिपेन्द्र कुमार पाण्डेले खेलकुद प्रतियोगिता सञ्चालन गर्न पाउनु आफैमा चुनौती र अवसरको कुरा भएको बताए । ‘हाम्रो काँधमा ठुलो जिम्मेवारी आएको छ, यो जिम्मेवारीलाई पुरा गर्न सबै एकजुट भएर लाग्नेछौं,’ पाण्डेले भने । उक्त क्षेत्रमा मधेसी समुदायको बाहुल्यता रहेको छ ।
प्रतियोगिताले मधेसी समुदायका बालबालिकाप्रति खेलकुदमा रुची बढाउने उनको विश्वास छ । राप्ती सोनारी गाउँपालिका खेलकुद शाखाको आयोजना तथा अमर ज्योति माविको ब्यवस्थापनमा उक्त प्रतियोगिता सञ्चालन गरिनेछ ।
