बाँके\एचपिभी खोप अभियान सुरु भएको तीन दिनमै बाँके जिल्लामा ५५ प्रतिशत बालिकालाई खोप लगाइसकिएको स्वास्थ्य कार्यालय बाँकेले जनाएको छ । स्वास्थ्य कार्यालय बाँकेका खोप फोकल पर्सन नरेश श्रेष्ठका अनुसार जिल्लाका चार वटा पालिकामा सुरु गरिएको पहिलो चरणको खोप कार्यक्रम अनुसार नेपालगन्ज, कोहलपुर, खजुरा र जानकीमा तीन दिनमा १३ हजार ६१९ जना बालिका र किशोरीलाई एचपिभी खोप लगाइएको छ ।

चार पालिकामा लक्षित उमेर समूहका २४ हजार ५८९ बालिका र किशोरीहरु रहेकोमा १३ हजार ६१९ जना अर्थात् ५५ प्रतिशतलाई खोप लगाई सकिएको बताएका छन। खोप अभियान सञ्चालनका लागि जिल्लाभर ५२४ वटा खोप केन्द्र स्थापना गरिएकोमा ती मध्ये २७६ वटा बिद्यालयमा, ८१ वटा विभिन्न स्वास्थ्य संस्थामा र अन्य १२६ वटा खोप केन्द्र कायम गरिएको स्वास्थ्य कार्यालय बाँकेले जनाएको छ ।

पहिलो चरणअन्तर्गत मङ्गलबारदेखि फागुन १ गतेसम्म नेपालगन्ज, कोहलपुर, खजुरा र जानकीमा खोप अभियान सञ्चालन गरिने तथा दोस्रो चरणअन्तर्गत माघ ३० देखि फागुन ६ गतेसम्म राप्ती सोनारी, बैजनाथ, डुडुवा र नरैनापुर गाउँपालिकामा खोप दिने कार्यक्रम रहेको छ ।