इटहरी/ विद्यार्थीहरूको प्रतिभा अभिवृद्धि गर्न तथा उनीहरूलाई ठूला मञ्चहरू प्रदान गर्ने उद्देश्यले समता स्कुल पूर्वी कन्सोर्टियमले आयोजना गर्दै आएको अन्तर समता गायन तथा नृत्य प्रतियोगिताको ५ औं शृंखला यही फागुन १५ गते सुनसरीको इटहरीस्थित समता स्कुलमा हुने भएको छ। प्रतियोगितालाई थप प्रभावकारी बनाउनका लागि न्यूज मानसरोवरलाई एक्सक्लुसिभ अनलाइन मिडिया पार्टनर तोकिएको छ।
नेपालभर न्यूनतम शुल्कमा गुणस्तरीय शिक्षा प्रदान गरिरहेको समता स्कुलहरूमध्ये पूर्वी नेपालका समता स्कुलहरूको समूह समता स्कुल पूर्वी कन्सोर्टियमले आयोजना गर्न लागेको प्रतियोगितामा इलाम, झापा, मोरङ, सुनसरी, उदयपुर, सिराहा, सप्तरी लगायतका जिल्लामा सञ्चालित समता स्कुलका विद्यार्थीहरूले गायन तथा नृत्य प्रस्तुती दिनेछन्। विभिन्न जिल्लाका ८०० भन्दा बढि प्रतिस्पर्धी विद्यार्थीहरूमध्ये विभिन्न चरणको छनोटपछि २३ वटा उत्कृष्ट प्रस्तुतिहरू अन्तिम प्रतिस्पर्धामा भिड्न लागेका हुन्।प्रतियोगितामा एकल गायन, युगल गायन, एकल नृत्य, सामूहिक नृत्य, र एकल र्याप जस्ता विधाहरू समावेश छन्।
स्टेजमा जम्दै चर्चित कलाकारहरू
कार्यक्रमलाई थप आकर्षक बनाउन प्रख्यात कलाकारहरूको विशेष प्रस्तुति समेत रहनेछ। राष्ट्रिय स्तरका चर्चित र्यापर निर्णय NSK, गायक तथा संगीतकार अजय अधिकारी, हिपहप कलाकारहरू ग्रुभी, निस लगायतका कलाकारहरूले कार्यक्रमलाई सङ्गीतमय बनाउन स्टेजमा जम्नेछन्।
पूर्वी कन्सोर्टियमका प्रमुख सन्तोष श्रेष्ठका अनुसार समताको यस प्रयासलाई न्यूज मानसरोवर संग कार्यक्रमको एक्सक्लुसिभ अनलाइन मिडिया पार्टनरका रुपमा सहकार्यले कार्यक्रमलाई व्यवस्थित एवम थप प्रभावकारी बनाउनेछ। फागुन १५ गते हुने कार्यक्रमको एक्सक्युसिभ भिडियो लाइभ पनि न्यूज मानसरोवर बाट गरिनेछ। प्रतियोगिताले विद्यार्थीहरूको प्रतिभा उजागर गर्ने मात्र नभई, उनीहरूको आत्मविश्वास वृद्धि गर्दै आपसी सहकार्य र प्रतिस्पर्धात्मक क्षमताको विकास गर्न महत्त्वपूर्ण योगदान पुर्याउने विश्वास गरिएको छ।
विद्यार्थीहरुको चौतर्फी बिकासमा पूर्वी कन्सर्टियमको प्रयासलाई अभिभावक तथा अन्य व्यक्तित्वहरुबाट राम्रो साथ मिलिरहेकोछ।
