बाँके\वन तथा वातावरण मन्त्रालय अन्तर्गत सञ्चालित एकीकृत भूपरिधि व्यवस्थापन आयोजनाले बाँकेका विभिन्न सामुदायिक वनमा रहेका सिमसार क्षेत्रको पुनरुत्थान गर्दा मानव–वन्यजन्तु द्वन्द्वका घटनामा कमी आउन थालेको छ ।

आयोजनाको कोहलपुर कार्यालयका फिल्ड प्रबन्धक प्रकाश थापाले मानव–वन्यजन्तु द्वन्द्व न्यूनीकरणका लागि बाँके राष्ट्रिय निकुञ्ज क्षेत्रभित्र १४ तथा कम्दी जैविक मार्गमा नौ गरी २३ वटा पोखरी निर्माण तथा सिमसार क्षेत्रको व्यवस्थापन गरिएको जानकारी गराए ।

फलस्वरूप पानी खोज्न बस्तीतर्फ आउने वन्यजन्तु वनजङ्गलमा रोकिँदा मानव–वन्यजन्तु द्वन्द्वका घटनामा कमी आउन थालेको छ ।  वनजङ्गलमा पानी नहुँदा पानी खोज्दै मानव बस्तीतर्फ वन्यजन्तु आउँदा मानव र वन्यजन्तुबिचको द्वन्द्वका घटना निकै बढी हुने गरेको तर पछिल्लो समयमा पानी पोखरी निर्माण तथा सिमसार क्षेत्रको पुनरुत्थान गरिँदा वन्यजन्तुको समेत सुरक्षा हुन गएको उहाँले बताउनुभयो । यो काम मानव–वन्यजन्तु द्वन्द्व घटाउन गरिएको  थापाले जानकारी गराए ।