इटहरी / ‘सबैका लागि शिक्षा ’ भन्ने मूल नाराका साथ सन् २००१ मा काठमाडौंको नयाँ बस्तीबाट सुरू भएको समता स्कुल आफ्नो स्थापनाको २५ औं वर्षमा प्रवेश गरेको छ। न्यून आय भएका अभिभावकका छोराछोरीलाई समान शुल्कमा गुणस्तरीय शिक्षा दिने लक्ष्य सहित अघि बढेको समता अभियान अहिले देशभर फैलिसकेको छ।
संस्थापक उत्तम संजेलको नेतृत्वमा स्थापना भएको समता स्कुल अहिले नेपालका अधिकांश जिल्लामा सञ्चालनमा छ। नर्सरीदेखि स्नातकोत्तरसम्मका सम्पूर्ण कक्षामा मासिक रु १०० मा गुणस्तरीय शिक्षा प्रदान गर्दै आएको यस विद्यालयले शिक्षामा समान पहुँचको अवधारणालाई मूर्तरूप दिँदै आएको छ।
२५ औं स्थापना दिवसको अवसरमा संस्थापक उत्तम संजेलले समता अभियानमा साथ दिने सम्पूर्ण विद्यार्थी, अभिभावक, शिक्षक तथा शुभेच्छुकहरूप्रति आभार व्यक्त गरेका छन्। साथै, भविष्यमा समता स्कुलले अझ परिस्कृत र समयसापेक्ष शिक्षामा ध्यान केन्द्रित गर्ने प्रतिबद्धता व्यक्त गरेका छन्।
समता स्कुलका विभिन्न जिल्लाका विद्यालयबाट उत्पादन भएका विद्यार्थीहरू स्वास्थ्य, प्रविधि, शिक्षा, प्रशासन, उद्यमशीलता, समाजसेवा लगायतका विभिन्न क्षेत्रमा सफलता हासिल गर्दै आएका छन्। काठमाडौंको बौद्धमा नर्सरीदेखि स्नातकोत्तर तहसम्म, काठमाडौंसहित पाँच जिल्लामा कक्षा १२ सम्म र अन्य जिल्लामा कक्षा १० सम्म शिक्षा प्रदान गरिँदै आएको छ।
माध्यमिक शिक्षा परीक्षा (SEE) मा प्रत्येक वर्ष उत्कृष्ट नतिजा हासिल गर्दै आएको समता स्कुलले २५ वर्षको यात्रामा हजारौं विद्यार्थीको जीवन परिवर्तन गर्दै नेपाली शिक्षामा नयाँ उदाहरण प्रस्तुत गरेको छ। समता स्कुलको भविष्यलाई अझ प्रभावकारी बनाउन नयाँ शिक्षण पद्धति र प्रविधिसँग समायोजन गर्दै लैजाने योजना संस्थापक संजेलले अघि सारेका छन्।
