बाँके\जेनजी आन्दोलनका क्रममा नेकपा (एमाले) लुम्बिनी प्रदेशका विभिन्न पार्टी कार्यालयहरूमा तोडफोड तथा आगजनी भएको छ।

प्रदेश अध्यक्ष राधाकृष्ण कँडेलका अनुसार पाल्पा, पूर्वी रुकुम र रोल्पा बाहेक लुम्बिनीका बाँकी ९ जिल्लामा रहेका एमालेका कार्यालयहरूमा क्षति पुगेको छ। उनले प्रदेश कार्यालयदेखि वडास्तरका पार्टी कार्यालयसम्म आन्दोलनकारीले तोडफोड गरेकाले क्षतिको विवरण संकलन सुरु गरिएको बताए।

बुटवलस्थित प्रदेश कार्यालय, रुपन्देहीको कोटीहवामा रहेको जिल्ला पार्टी कार्यालय, परासी, दाङ, बाँकेको नेपालगन्जलगायत स्थानका पार्टी कार्यालयमा सानोदेखि ठूलो मात्रामा क्षति भएको बताइएको छ।

कँडेलका अनुसार क्षति विवरण छिट्टै संकलन गर्नेगरी काम अघि बढाइएको छ भने केही कार्यालयमा एमाले नेताहरूले प्रत्यक्ष अनुगमन पनि सुरु गरिसकेका छन्।

आन्दोलनका क्रममा लुम्बिनी प्रदेशमा एमाले मात्र नभई नेपाली कांग्रेस, माओवादी केन्द्र र जनमोर्चाका पार्टी कार्यालयहरूमा समेत तोडफोड तथा आगजनी भएका थिए। अन्य दलहरूले पनि आफ्ना कार्यालय क्षतिको विवरण संकलनको काम सुरु गरेको जनाएका छन्।