बाँके\नेकपा एमालेका महासचिव शंकर पोखरेलले एमाले संकटबाट भाग्ने होइन त्यसको सामना गर्ने पार्टी भएको बताएका छन।
पार्टीले आयोजना गरेको प्रतिगामी षडयन्त्रका विरुद्ध जनपरिचालन कार्यक्रम अन्तरगत नेपालगञ्जको जनसभालाई सम्बोधन गर्दै महासचिव पोखरेलले वर्तमान देशको संकटको निकास एमालेको अगुवाईमा मात्र सम्भाव रहेको उल्लेख गरे ।भदौ २३ र २४ गतेको तोडफोड र विध्वंस नेपाल राज्यलाई कमजोर पार्नका लागि रचिएको षडयन्त्र भएको पोखरेलको भनाइ छ ।
सिंहदरबार,सर्वोच्च अदालत जस्ता निकायमा आगो लगाएर राज्य माथी गम्भिर अपराध गरिएको उल्लेख गरे । यसमा को को संलग्न थिए भन्ने कुरा खुल्दै जाने पोखरेलले बताए । यस विध्वंसमा काठमाडौं महानगरका प्रमुख बालेन्द्र साहको संलग्नताप्रति लक्षित गर्दै पोखरेलले भन्नुभयो ‘देशैभरीका धेरै स्थानीय तह र वडा कायालयहरु जलाइए । तोडफोड गरिए । तर काठमाडौं महानगरमा केही गरिएन ।
वडाहरुमा केही गरिएन । शितलनिवास जलाइयो छेउमै रहेको निर्मल निवासमा एउटा ढुंगा पनि लागेन । यसबाट यो आगजनी र तोडफोडमा को संलग्न छ भनेर सहजै बुझ्न सकिन्छ ।’ महासचिव पोखरेलले एमालेका नेता कार्यकर्ता देशमा लोकतन्त्र ल्याउनका लागि लामो समय जेल बसेका,भूमिगत बसेका भएकोले लोकतन्त्र विरोधी सानातिना हमलाबाट बिचलित हुनु नहुने तर्क राखे ।
‘एमालेका नेता कार्यकर्ता लोकतन्त्र प्राप्तीका लागि लामो समय जेल बस्यौं । लामो समय भुमिगत बस्यौं । त्यसैले हामीलाई संकटसँग जुध्ने अनुभव छ’ पोखरेलले भन्नुभयो ‘षडयन्त्रकारीलाई लागेको थियो पार्टी कार्यलय जलाएपछि एमाले सकिन्छ । घर जलाइपछि नेता कार्यकर्ता सकिन्छन् । तर अहिले मैदानमा हेर्नुभयो भने एमाले भन्दा अरु कुनै शक्ति देख्नु भएको छ ? ’ उहाँले राजनीतिक दलका कार्यकर्तालाई उच्च मनोबलका साथ पार्टी काममा खटिन आह्वान गर्नु भएको छ ।
