कोहलपुर\ कोहलपुरमा जारी कोहलपुर महोत्सव–२०८२ मा शनिबार दर्शकको उल्लेखनीय उपस्थिती देखिएको छ । महोत्सवको चौथो दिन करिब २० हजारभन्दा बढी दर्शकको उपस्थिति भएपछि महोत्सवस्थल मानव सागरले भरिएको थियो ।

चर्चित कलाकारहरूको प्रस्तुति रहने भएपछि कोहलपुर मात्र नभई आसपासका गाउँ–गाउँबाट दर्शकहरू महोत्सव स्थलतर्फ आकर्षित भएका थिए । शनिबार चर्चित गायिका शान्तीश्री परियार र भूमिका गिरीसँगै चर्चित गायक कमल वि.सी. माल्दाई, राज कुश्मी आफ्नो सशक्त सांगीतिक प्रस्तुति दिएका थिए भने नृत्यङ्गना तथा मोडल सुनिता दहितले दर्शकलाई नचाएका थिईन । दर्शकको उत्साहजनक सहभागिताका कारण राष्ट्रिय तथा स्थानीय कलाकारहरूले समेत खुलेर प्रस्तुति प्रस्तुत गरेका थिए ।

यही पौष ९ गतेदेखि सुरु भएको महोत्सवमा यस वर्ष नयाँ प्रयोगका रूपमा ‘जनपरी’ कार्यक्रम समावेश गरिएको छ । साथै, विभिन्न व्यावसायिक स्टल, बाल उद्यान, थारु गाउँ, कृषि प्रदर्शनी तथा विविध मनोरञ्जनात्मक गतिविधिहरूका कारण महोत्सव थप आकर्षणको केन्द्र बनेको छ ।

महोत्सवकै क्रममा शनिबारदेखि टक शो कार्यक्रमको समेत औपचारिक सुरुवात गरिएको छ । पहिलो दिन “हाम्रो स्वास्थ्य, हाम्रो सरोकार” विषयमा आयोजित टक शोमा नेपालगञ्ज मेडिकल कलेज शिक्षण अस्पतालका निर्देशक प्रा. डा. रेशम बहादुर राना तथा स्वास्थ्य मन्त्रालयका पूर्व अतिरिक्त सचिव डा. श्यामसुन्दर यादव वक्ताका रूपमा सहभागी भई आफ्ना धारणा राखेका थिए । कार्यक्रमको सहजीकरण सञ्चारकर्मी प्रियास्मृति ढकालले गरेका थिए ।

कोहलपुर उद्योग वाणिज्य संघका अध्यक्ष तथा महोत्सव मूल आयोजक समितिका संयोजक प्रदीप भट्टराईका अनुसार महोत्सव अवधिभर हरेक दिन बिहान १० देखि ११ बजेसम्म विभिन्न समसामयिक शीर्षकमा केन्द्रित टक शो सञ्चालन गरिनेछ । टक शो कार्यक्रममा सहभागी हुन हरेक दिन बिहान १० बजेसम्म महोत्सव परिसरमा निःशुल्क प्रवेशको व्यवस्था गरिएको जानकारी पनि उनले दिएका छन् ।

भोली पल शाह आउने

महोत्सवको पाँचौँ दिन आइतबार चर्चित नायक पल शाह महोत्सवमा सहभागी हुने भएका छन् । कला, संस्कृति तथा अतिथि सत्कार उप–समितिका संयोजक चण्डी प्रसाद गैरेका अनुसार आइतबार नायक शाहसँगै आस्था रावत, रमेशराज भट्टराई र बबिता लम्सालको प्रस्तुति रहनेछ । त्यस्तै, हास्य कलाकार सुरेश केसी (मुलासाग) र शिव शंकर (पानवाला) ले पनि दर्शकलाई हँसाउनेछन् । साथै, स्थानीय कलाकारहरूको समेत प्रस्तुति रहने छ ।

भोलीदेखि विद्यालयस्तरीय सामूहिक नृत्य प्रतियोगिता
महोत्सवमा विद्यालयस्तरीय सामूहिक नृत्य प्रतियोगिता समेत आयोजना गरिने भएको छ । आइतबारदेखि प्रतियोगिता सुरु हुने कला, संस्कृति तथा अतिथि सत्कार उप–समितिका सह–संयोजक देविलाल सुनारले जानकारी दिएका छन् ।