कोहलपुर,बाँके:मधेस प्रदेशमा नयाँ सरकार गठनको लागि विपक्षी दलहरुले आज (शुक्रबार) प्रदेश प्रमुख समक्ष मुख्यमन्त्रीको दाबी पेस गर्ने तयारी गरेका छन्। बिहीबार बसेको नेकपा एमाले, नेकपा माओवादी केन्द्र र जनमत पार्टीको बैठकले मधेस सरकारको नेतृत्व जनमत पार्टीलाई दिने सहमति गरेको छ।
सीके राउतको सचिवालयले आज (शुक्रबार) एमाले, माओवादी केन्द्र र जनमत पार्टीका प्रदेश संसदीय दलका नेताले प्रदेश प्रमुख समक्ष दाबी पेस गर्ने जानकारी दिएको हो। तर, मधेसमा एमाले, माओवादी र जनमतको सांसद संख्याले मात्रै नयाँ सरकार गठनको लागि आवश्यक बहुमत पुग्दैन। त्यसको लागि नेकपा एकीकृत समाजवादी र लोकतान्त्रिक समाजवादी पार्टीको पनि समर्थन आवश्यक पर्छ।
तर, तीन दलबीच हिजो भएको सहमतिमा नेकपा एकीकृत समाजावादी र लोकतान्त्रिक समाजवादी पार्टीका नेताले हस्ताक्षर गरेका छैनन्। एमाले, माओवादी र जनमतबीचको सहमतिमा नेकपा एस र लोसपाको पनि समर्थन रहेको दाबी तीन दलका नेताले गर्दै आएका छन्।
जनमतको नेतृत्वमा सरकार बनाउन सहमति गरेका पाँच दलले आज प्रदेश प्रमुख समक्ष दाबी पेस गर्ने माओवादी संसदीय दलका नेता भरतप्रसाद साहले जानकारी दिए।
‘हिजो एमाले, माओवादी र जनमतका नेताले मात्रै सहमति पत्रमा हस्ताक्षर गर्नु भएकाे छ। आज लोसपा र नेकपा एसका नेताले पनि त्यो सहमति पत्रमा हस्ताक्षर गर्नुहुन्छ,’ साहले शुक्रबार बिहान नेपालखबरसँग भने, ‘बहुमत सांसदको हस्ताक्षर भएपछि हामी मुख्यमन्त्रीसमक्ष आजै दाबी पेस गर्ने तयारीमा छौँ।’
उनले नेकपा एस र लोसपाले पनि जनमत पार्टीलाई मुख्यमन्त्री बनाउन सहमती जनाइसकेको दाबी गरे। तीन दलबीच हिजो भएको सहमति पत्रमा एमाले संसदीय दलका नेता सरोजकुमार यादव, माओवादी संसदीय दलका नेता भरतप्रसाद साह र जनमत पार्टीका संसदीय दलका नेता महेश प्रसाद यादवको मात्रै हस्ताक्ष छ।
सहमति पत्रमा नेकपा एसका संसदीय दलका नेता गोविन्द न्यौपाने र लोसपाका संसदीय दलका उपनेता उपेन्द्र महतोको पनि नाम राखिएको थियो। तर, उनीहरुले हिजो त्यो सहमति पत्रमा शुक्रबार हस्ताक्षर गरेका छैनन्।
उनीहरुले हस्ताक्षर नगरेपछि न्यौपाने र महतोको नाम छोपेर तीन दलका नेताले मात्रै हस्ताक्षर गरेको सहमति पत्र शुक्रबार सार्वजनिक गरिएको थियो।
‘उक्त सहमति पत्रमा हस्ताक्षर गर्न बाँकी नेकपा एसका गोविन्द न्यौपाने र लोसपाका उपेन्द्र महतोले आजै हस्ताक्षर गर्नुहुन्छ,’ माओवादी संसदीय दलका नेता साहले भने, ‘जनमतलाई प्रदेश सरकारको नेतृत्व दिन उहाँहरुले पनि सहमती जनाइसक्नु भएको छ। हस्ताक्षर गर्न मात्रै बाँकी हो।’
१०७ सदस्यीय प्रदेशसभामा नयाँ सरकार गठननको लागि ५४ जना प्रदेससभा सदस्यको समर्थन आवश्यक पर्छ। मधेस प्रदेश सभामा नेकपा एमालेका सभामुखबाहेक २४, जनमत पार्टीका १३, माओवादी केन्द्रका ९, लोकतान्त्रिक समाजवादी पार्टीका ८ र एकीकृत समाजवादीका ७ सांसद छन्। त्यसैगरी कांग्रेसका २२ र जसपाका १८ सांसद छन्।
नेकपा एमाले र माओवादी केन्द्रले मधेश सरकारबाट समर्थन फिर्ता लिएपछि जसपा अध्यक्ष उपेन्द्र यादव निकट मुख्यमन्त्री सरोजकुमार यादव पाँचौँपटक विश्वासको मत लिनुपर्ने अवस्थामा पुगेका छन्। उनले यही जेठ २३ गते विश्वासको मत लिने तयारी गरेका छन्।
एमाले, माओवादी, जनमतसहितको विपक्षी गठनबन्धनमा बहुमत पुगेको खण्डमा जनमत पार्टी संसदीय दलका नेता महेशप्रसाद यादव मुख्यमन्त्री बन्ने सम्भावना छ।
गएको निर्वाचनमा माओवादीले टिकट नदिएपछि यादव जनमत पार्टीबाट उम्मेदवार बनेका थिए। उनले सप्तरी निर्वाचन क्षेत्र नम्बर २ को (ख) मा माओवादीका उमेश यादवलाई फराकिलो मतान्तरले पराजित गरेका थिए। चुनावमा महेशले १३ हजार ३२५ मत ल्याउँदा उमेशले ७ हजार २३ मत मात्रै पाएका थिए।
