काठमाडौं : काभा वुमन्स नेसन्स लिगमा फाइनल प्रवेशका लागि आज नेपालले इरानसँग खेल्दैछ। खेल नेपाली समय अनुसार साँझ सवा ५ बजे सुरु हुनेछ।

सेमिफाइनलको पहिलो खेलमा भारत र श्रीलंका भिड्नेछन्। यी दुईको खेल दिउँसो ३ बजे त्रिपुरेश्वर स्थित कभर्ड हलमा हुनेछ। भारत तालिकाको शीर्ष स्थानमा रहँदै सेमिफाइनलमा पुगेको हो भने श्रीलंका तालिकाको पुछारमा रहेर अन्तिम चारमा स्थान बनायो। नेपाल र इरान तालिकाको दोस्रो र तेस्रो स्थानमा रहेर सेमिफाइलमा स्थान बनाए।

नेपालले श्रीलंका र माल्दिभ्सलाई सोझो सेटमा हराएको थियो। भारतलाई महिला भलिबलमा पहिलो पटक हराएको नेपाली टोली भने इरानसँग ३-२ को सेटमा पराजित हुन पुग्यो। आज भने समूह चरणमा हारको बदला लिँदै फाइनलमा स्थान सुरक्षित गर्नु पर्ने नेपाललाई चुनौति रहेको छ। इरान भने भारतसँग पराजित टोली हो।