८ श्रावण २०८१, मंगलवार

अव्यवस्थित बसोवासीलाई प्रमाणपत्र दिने उपमहानगरको तयारी
  • न्युज मानसराेवर

बुटवल\बुटवल उपमहानगरपालिकाले अव्यवस्थित बसोवासीको अभिलेख राख्न थालेको छ । जसका लागि बुटवल उपमहानगरपालिकाले अव्यवस्थित रूपमा बसोबास गरिरहेका परिवारलाई बसोबासको प्रमाणपत्र दिने तयारी गरेको प्रमुख प्रशासकीय अधिकृत टेकराज पन्थीले जानकारी दिएका छन।

बुटवलका १९ वटै वडाहरूमा लामो समयदेखि बसोबास गर्दै आएका बासिन्दालाई दाबी विरोध र गुनासो भएमा १५ दिनभित्र कागजातसहित दाबी विरोध गर्न उपमहानगरपालिकाले आह्वान गरेको छ ।

१५ दिनभित्र कुनै दाबी विरोध नआएमा लगत्तै बसोबासको प्रमाण पत्र वितरण गर्ने गरी तयारी भएको प्रमुख प्रशासकीय अधिकृत पन्थीले बताउनुभयो । उहाँले लामो समयदेखि भोगचलन गर्दै आएका र तत्काल लालपुर्जा पाउने प्रक्रियामा जान नसकेका बासिन्दाको अभिलेख राख्ने र सो क्षेत्रको जग्गा किनबेचमा समेत रोक लगाउने उद्देश्यले बसोबासको प्रमाणपत्र दिन लागेको बताएका छन।

बुटवलभित्र १६ हजार ५ सय २१ घरपरिवार अव्यवस्थित रूपमा बसोबास गर्दै आएको तथ्याङ्क सङ्कलनपछि सार्वजनिक क्षेत्र अतिक्रमण रोक्न र अवैध रूपमा भइरहेको किनबेच रोक्ने उद्देश्यले बसोबासको प्रमाण पत्र दिने तयारी गरेको उनले भनेका छन।

भूमिसम्बन्धी ऐनले स्थानीय तहलाई दिएको वास्तविक भूमिहीन दलित, भूमिहीन सुकुम्वासी र अव्यवस्थित बसोबासीको लगत सङ्कलन गर्ने, पहिचान गर्ने र प्रमाणीकरण गर्न सक्ने अधिकारबमोजिम नै लगत सङ्कलन र पहिचान गर्ने काम गर्न लागिएको उनले जानकारी गराए ।

‘‘स्थानीय सरकारका रूपमा आफ्नो सिमानाभित्र को कस्तो अवस्थामा बसिरहेको छ भन्ने अभिलेख राख्ने र त्यसरी बसिरहेकोमध्ये लालपुर्जाविहीन परिवारलाई बसोबासको प्रमाणपत्र दिन लागिएको हो,– उनले भनेका छन।’’

गत स्थानीय निर्वाचनमा बुटवल उपमहानगरपालिकाको प्रमुखमा विजयी भएपछि खेलराज पाण्डेयले अव्यवस्थित बसोबासीलाई बसोबासको प्रमाण पत्र दिने निर्णय गर्नुभएको थियो । चुनावबाट अनुमोदन भएको एजेन्डाअनुसार नै पहिलो निर्णय गरेको र सोहीअनुसार अव्यवस्थित बसोबासीलाई प्रमाण पत्र दिइने नगर प्रमुख पाण्डेयले बताए ।

‘‘अव्यवस्थित बसोबासीलाई कहिलेसम्म अव्यवस्थित भनिरहने, कहिलेसम्म व्यवस्थित नगर्ने, यो बुटवलको मूल समस्यामध्येको एक हो, उनले भने–अहिले यो बसोबासको क्षेत्रमा पनि अवैध रूपमा किनबेच र थप अतिक्रमण भइरहेको छ, त्यसलाई रोक्नका लागि पनि हामीले बसोबासको प्रमाणपत्र दिन लागेका हौँ ।’’

उनले बसोबासको प्रमाणपत्र वितरणपश्चात् थप बसोबास रोकिने र त्यसपछि हुने अतिक्रमण रोकिने समेत उल्लेख गरेका छन।

  • २१ मंसिर २०७९, बुधबार प्रकाशित

  • Nabintech