नेपालगन्ज : नेपालगन्ज उपमहानगरपालिका वडा नम्बर २१ मा पर्ने विर्ता गाउँमा एक युवकको हत्या भएको छ । नेपालगन्ज उपमहानगरपालिका वडा नम्बर २१ निवासी अन्दाजी २० वर्षका अरबी खाँको हत्या भएको जिल्ला प्रहरी कार्यालय बाँकेका प्रहरी नायव उपरीक्षक एवम् प्रवक्ता नारायण डाँगीले जानकारी दिए ।

युवकको हत्या गरिएको अवस्थामा आइतबार बिहान १० बजेतिर शव फेला परेको उनले बताए । घाँटीमा धारिलो हतियार प्रहार गरेर खाँको हत्या गरिएको अवस्थामा शव फेला परेको डिएसपी डाँगीले जानकारी दिए । मृतक नेपालगन्ज उपमहानगरपालिका वडा नम्बर २१ का पुर्ववडाअध्यक्ष रन्जित खाँको नाती भएको खुलेको छ ।

घटनाबारे अनुसन्धान भइरहेको प्रहरीले जनाएको छ । मृतक युवकको शव पोष्टमार्टमका लागि भेरी अस्पताल नेपालगन्जमा राखिएको बताइएको छ । उक्त घटना रातको समयमा भएको हुन सक्ने प्रहरीले अनुमान गरेको छ ।