बाँके\निःशुल्क पाउनेदेखि बीमाबाट उपलब्ध हुने औषधि अभाव हुँदा जाजरकोट अस्पतालका बिरामी समस्यामा परेका छन् । दैनिक ठूलो मात्रामा बिरामी आउने उक्त अस्पतालमा जाँच गरेर औषधि किन्न आधा घण्टा टाढा जानुपर्ने बाध्यता  छ ।

दुई हप्ता अघिदेखि औषधि सकिएको भए पनि अस्पताल व्यवस्थापनले ध्यान नदिँदा आफूहरू मारमा परेको स्वास्थ्यकर्मीले  बताए । दैनिक निःशुल्क र बीमा गरेबापत पाइने औषधि खोज्दै बिरामी आए पनि नहुँदा खाली पठाउनु परेको फार्मेसी शाखाले बताएको छ । मौसमी फ्लुदेखि अन्य रोगका बिरामीका कारण केही दिनदेखि अस्पताल भरिभराउ रहँदै आएको छ ।

औषधि लिनका लागि बिरामीका आफन्त फार्मेसीमा आए पनि औषधि नहुँदा छैन भन्ने जवाफ दिनुपर्दा  र उनीहरुको गाली खानुपर्दा आफूहरू हैरान भएको स्वास्थ्यकर्मीले  बताए । स्वास्थ्य बीमा गरेको कागज देखाउँदा पनि औषधि नपाएर बाहिर गई औषधि खरीद गर्नुपरेको भेरी नगरपालिका– २ की रमिता कार्कीले गुनासो गरिन् ।

‘औषधि अभाव भए समयमै खरीद गर्नुपर्नेमा अहिलेसम्म के हेरेर बसेको होला ?’, उनले प्रश्न गरिन् । उक्त अस्पताल ५० शैय्याको छ । यता स्वास्थ्य सेवा कार्यालयका प्रमुख नवराज कँडेलले औषधि जाजरकोट पठाउन लागिएको जानकारी दिए ।