बैजनाथ:बाँकेको बैजनाथ गाउँपालिकाले पूर्वाधार विकासमा उल्लेखनीय काम गरेको छ । संघ, प्रदेश र आफ्नै बजेटमा थुप्रै पूर्वाधारका काम सम्पन्न भएका छन् । योजना शाखा प्रमुख डोटी नेपालीका अनुसार चालू आर्थिक बर्ष २०८०÷८१ मा संघीय समपूरक बजेट अन्तर्गत वडा नम्बर २ मा ८६० मिटर लामो कालोपत्रे सडक निर्माण सम्पन्न भएको छ ।
शैलवादेखि राजीपुर हुँदै जब्दवा जोड्ने उक्त सडक संघ र र पालिकाको ६०/६० लाख लागतमा निर्माण गरिएको हो । यस्तै प्रदेश समपूरक बजेट अन्तर्गत आर्थिक बर्षमा ४ वटा योजना सम्पन्न भएको नेपालीले बताए । वडा नम्बर ४ को सिमलघारी चोकदेखि वडा कार्यालयसम्म जोड्ने ७१४ मिटर बाटो कालोपत्रे, वडा नम्बर ६ को एक नम्बर चोकदेखि रामपुर हुँदै कालिका जोड्ने ५५० मिटर अस्फाल्ट पीच, वडा नम्बर ५ को त्रिवेणी चोकदेखि कालिका हुँदै गुनापुर जोड्ने ५०० मिटर बाटो कालोपत्रे र वडा नम्बर ५ को निमनगरदेखि पालिकासम्म ५२६ मिटर बाटो कालोपत्रे सम्पन्न भएको छ ।
यस्तै तराई मधेश समृद्धि कार्यक्रम अन्तर्गत बढही चोकदेखि जेठीनाला हुँदै पालिकासम्म जोड्ने ४५० मिटर लामो सडक पनि आर्थिक बर्षमै अस्फाल्ट पीच भएको छ । योजना शाखा प्रमुख नेपालीका अनुसार संघीय सशर्त बजेट अन्तर्गत वडा नम्बर ८ थपुवास्थित शंकर माविको कृषि क्याम्पसको ८ कोठे भवनका लागि १ करोड आएकोमा ८० लाखमा ठेक्का सम्झौता भई काम सम्पन्न भइसकेको छ । पालिकाको आफ्नै बजेटमा पनि थुप्रै योजनाहरु सम्पन्न भएका छन् ।
वडा नम्बर १ को रत्न राजमार्गदेखि रारा आधारभूत विद्यालय गाभरसम्म २५० मिटर बाटो पीच, वडा नम्बर १ महादेव चोकदेखि जनजागरण आधारभूत विद्यालयसम्म २५० मिटर पीच, वडा नम्बर ३ रत्न राजमार्गदेखि बागेश्वरी मावि हुँदै तल्लो गाभरसम्म १५० मिटर पीच, वडा नम्बर ६ खजुरा र वडा नम्बर ८ छगरीपुर जोड्ने १५० मिटर पीच निर्माण सम्पन्न भइसकेको योजना शाखा प्रमुख नेपालीले जानकारी दिए ।
बैजनाथ गाउँपालिका कार्यालयको पर्खाल, पानीको छहरा र प्रतिक्षालय निर्माण कार्य ३५ लाख २८ हजार बजेटमा सम्पन्न गरिएको छ । यसैगरी वडा नम्बर ७ मा अञ्जली थारुको घरदेखि सहकारी जोड्ने ४२४ मिटर पक्की नाला २० लाखको लागतमा निर्माण सम्पन्न भई प्रदेश सरकारबाट हस्तान्तरण भएको छ । यस्तै वडा नम्बर ४ को इटा नालामा २० लाखको लागतमा तटबन्ध सम्पन्न भई प्रदेश सरकारबाट हस्तान्तरण भइसकेको योजना शाखा प्रमुख नेपालीले बताए ।
संघको बजेटमा वडा नम्बर २ को भौरीकुना चोकदेखि चन्द्र चोकसम्मको ९२० मिटर सडक स्तरोन्नति र १३३ मिटर पक्की नाली निर्माण एवम् बैजनाथ ८ पिपलचौतारादेखि बेल्डाँडी हुँदै दोन्द्रा नालासम्मको ९४६ मिटर सडक स्तरोन्नति र १३७ मिटर पक्की नाली निर्माण सम्पन्न भएको छ । गएको आर्थिक बर्षमा अन्य ससाना थुप्रै योजना समेत सम्पन्न भएको नेपालीले बताए ।
