कोसी:सप्तकोसी नदीमा बस खसेको छ। बिहीबार बेलुकी कोसी ब्यारेजबाट सप्तकोसी नदीमा बस खसेको हो। विराटनगरबाट सप्तरीतर्फ जाँदै गरेको बस कोसी ब्यारेजको पुलबाट नदीमा खसेको सुनसरीका प्रमुख जिल्ला अधिकारी रामचन्द्र तिवारीले  जानकारी दिए।

उनका अनुसार, बसबारे थप विवरण आइसकेको छैन। ‘बसबारे थप विवरण खुलिसकेको छैन,’ उनले भने, ‘हामी त्यहाँ पुग्दैछौँ।’ सप्तकोसी नदीमा खसेको बसबाट २० जनाको घाइते अवस्थामा उद्धार गरिएको छ। बिहीबार साँझ विराटनगरबाट सप्तरीतर्फ जाँदै गरेको को १ ख ४६०१ नम्बरको बस कोसी ब्यारेजको पुलबाट नदीमा खसेको थियो।

अहिले प्रहरीले उद्धार कार्य गरिरहेको छ। सुनसरीका एसपी बिपिन रेग्मीका अनुसार, २० जना घाइतेलाई विभिन्न अस्पतालमा उपचारका लागि पठाइएको छ। बसमा कति यात्रु थिए भन्ने खुलिसकेको छैन।