बाँके\बाँकेको राप्तीसोनारी गाउँपालिका –९ ढकेरीमा अवस्थित वनस्पति उद्यान पछिल्लो समय आन्तरिक र बाह्य पर्यटकको रोजाइमा पर्न थालेको छ । विभिन्न प्रजातिका फुलहरू ढकमक्क फुलेका कारण पछिल्लो समय पार्कमा आउने र टिकटक बनाउनेहरूको सङ्ख्या दिनप्रतिदिन बढ्न थालेको छ ।  ढकेरी वनस्पति उद्यानका सहायक वैज्ञानिक अधिकृत रामकृष्ण भण्डारीका अनुसार २०८१  करिब आठ हजार   जनाले पार्कको अवलोकन गरेका छन् ।

“सामाजिक सञ्जाल टिकटक बनाउनकै लागि दाङ, बर्दियालगायतका जिल्लाबाट समेत पर्यटकहरू आउनेगरेका छन्” सहायक वैज्ञानिक अधिकृत भण्डारीले भने, “अहिले ढकेरी पार्क आकर्षक र रोमाञ्चक पनि भएको छ ।” अन्य समयमा सार्वजनिक बिदाको दिनमा  १सय ५०  जनासम्म आउने, पार्कमा सामान्य दिनमा दैनिक २० देखि ५० जनासम्म आउने गरेका छन् ।

पार्क घुम्न आएका कोहलपुर नगरपालिका वडा नं.१३ का निम बहादुर वलीले सुन्दर पार्कभित्र प्रवेश गर्दा मनै आनन्दित भएको अनुभूति भएको बताए । “चारैतिर फूलको पार्क भएका कारण यहाँ आएर घुम्न एकदमै आनन्ददायक छ”वलीले, “पहाडको नजिकै भएका कारण गर्मी समयमा शीतलताको पनि अनुभूति हुने गरेको छ ।” पार्कभित्र विभिन्न थरिका फुलहरूले यतिबेला चारैतिर रङ्गिएको छ ।

पार्कभित्र विभिन्न प्रजातिका फूलसहित हाल पार्कमा (५००) पाँच सय हाराहारीमा  प्रजातिका अन्य वनस्पति रहेका छन्  कार्यालय सहयोगी शिवराज घिमिरेले जानकारी दिए । घिमिरेका अनुसार पार्कभित्र चेरी, डालिया, पिटुनियालगायतका बहुबर्षीय र मौसमी फूलहरू छन् ।

पार्कमा अध्ययनका लागि काठमाडौं, पोखरालगायतका विद्यार्थी आउनेगरेका छन् । ढकेरी पार्कले वनस्पतिहरूको सङ्कलन, पहिचान र संरक्षणको क्षेत्रमा काम गर्दै आएको छ । ढकेरी पार्क अवलोकनका लागि भारतीय पर्यटक समेत आउनेगरेका छन् ।