मुगु\ राराताल घुम्न देशभरका विद्यार्थी आउने क्रम बढ्दै गएको छ। रारातालसम्म सडक जोडिएसँगै विभिन्न विद्यालयबाट शैक्षिक भ्रमणमा आउने विद्यार्थीको संख्या बढ्दै गएको हो।

सुदूरपश्चिम प्रदेशको बाजुरा र मुगुको खत्याड गाउँपालिका सडक सञ्जालमा जोडिएसँगै सुदूरपश्चिम सहित अन्य प्रदेशबाट घुम्न आउनेको संख्या पनि बढिरहेको छ। बाजुराको ज्ञानोदय माध्यमिक विद्यालयबाट शैक्षिक भ्रमणमा आएका शिक्षक मदन पौडेलले खत्याड गाउँपालिकाको मसानेसम्म सडक सञ्जाल जोडिएपछि एकै दिनमा रारा आउन सफल भएको बताए।

पहिला पनि शैक्षिक भ्रमणमा राराताल आएको स्मरण गर्दै उनले भने, ‘तीन वर्ष पहिले रारामा शैक्षिक भ्रमण हिँडेर आउजाउ गर्दा पाँच दिन लागेको थियो, अहिले गाडीमा दुई दिनमै आउजाउ हुने भयो।’ उनले १० कक्षामा अध्ययनरत १५ विद्यार्थी र तीन शिक्षक प्रतिव्यक्ति ६ हजार खर्चिएर रारा भ्रमणमा आएको बताए। छात्रा जानकी तिमिल्सिनाले रारा घुम्न पाउँदा खुसी लागेको बताइन्।

‘राराताल सफा, मनोरम र निश्चल रहेको देखेँ। रारा घुम्न पाउँदा खुसी लाग्यो,’ उनले भनिन्। भ्रमणका क्रममा वनस्पति, जडीबुटी, चराचुरुंगी, माछाका साथै मठमन्दिर देखे पनि त्यसको विवरण र सङ्ग्रहालयको व्यवस्थापन नहुँदा धेरै जानकारी लिन नपाएको गुनासो उनले गरिन्।

भ्रमणमा आउने आगन्तुकले राराको मध्यवर्ती क्षेत्रभित्र पाइने विभिन्न प्रजाति र यहाँको संस्कृतिका विषयमा सूचना लिन सहज होस् भन्ने उद्देश्यले निर्माण भएको सूचना केन्द्र अहिलेसम्म सञ्चालनमा आउन सकेको छैन।

रारा राष्ट्रिय निकुञ्जका कार्यालय प्रमुख विश्वबाबु श्रेष्ठले निकुञ्जभित्र रहेका विभिन्न प्रजातिका वनस्पति, जडीबुटी, चराचुरुंगी, माछाको विवरण सूचना भवनमा अभिलेख राख्नलाई अर्थ मन्त्रालयबाट रकमको व्यवस्थापन नभएकाले सञ्चालनमा ल्याउन नसकिएको बताए।

चालु आर्थिक वर्षमा रारातालमा भ्रमण गर्न आउने नेपालीको संख्या ६ हजार सात सय २७ पुगेको छ । विदेशी पर्यटकको संख्या भने एक सय ७७ रहेको छ। भ्रमण गर्न आउने आगन्तुकबाट ११ लाख ६० हजार दुई सय राजस्व जम्मा भएको निकुञ्ज कार्यालयले जनाएको छ।