बाँके\नेकपा माओवादी केन्द्रले आज शनिवार देशभर वडा सम्मेलन गर्दैछ ।
पार्टी प्रवक्ता कृष्णबहादुर महराले शुक्रवार एक विज्ञप्ति जारी गर्दै वडा सम्मेलन हुनेबारे जानकारी दिए ।
माओवादीले वडा समितिको चयन गर्दा सकेसम्म सहमतिमा गर्न निर्देशन गरेको छ । निर्वाचन हुने अवस्था आएमा मर्यादित तरिकाले पार्टीको आन्तरिक लोकतन्त्रका रूपमा बुझेर सोही अनुसारको भूमिका निर्वाह गर्न सबै पार्टी पंक्तिलाई आग्रह गरेको छ ।
विज्ञप्तिमा उल्लेख छ, ‘पार्टीको वडा सम्मेलनमा कुनै पनि विभाजित मनोविज्ञान एवं मानसिकता नराखी एकताबद्ध भएर सर्वहारा वर्गप्रति निष्ठावान, जनताप्रति उत्तरदायी र समाजवादी क्रान्तिको यात्रामा लाग्नसक्ने नयाँ एवं रुपान्तरित पार्टी निर्माणमा लाग्न आम जनसमुदायमा हार्दिक अपिल गर्दछ ।’
माओवादी केन्द्रले मंसिर ११ गते सबै पालिका र मंसिर २५ गते सातै प्रदेशमा नेतृत्व चयनका लागि सम्मेलन गर्ने भएको छ ।
माओवादीको राष्ट्रिय सम्मेलन पुस ११, १२ र १३ गते काठमाडौंमा हुने गरी तोकिएको छ ।
