कोहलपुर,बाँके:अनुहारमा चाया अथवा पोतो आउनु सबैभन्दा बढी पिरलो मानिन्छ। अनुहारमा आएको कालो दागलाई सामान्य भाषामा चाया वा पोतो भनिन्छ। यो समस्या महिला र पुरुष दुवैमा देखिन सक्छ। विभिन्न कारणले अनुहारमा चाया वा पोतो आउन सक्छ। घामको किरणको असर तथा भिटामिन सीको कमीले पनि चाया-पोतो आउने गर्छ। जसले भिटामिन सीको पर्याप्त मात्रामा सेवन गर्छन्, उनीहरूलाई चाया-पोतोले सताउन सक्दैन।
घामको किरणबाट आउने समस्याका कारण अनुहारमा आएको चाया हटाउन घरेलु उपाय अपनाउन सकिन्छ। यी उपाय अपनाउन सके अनुहारको चाया हट्नुका साथै अनुहारमा कान्ति छाउँछ।
घरेलु विधि
– सफा हुने गरी मुख धुने। घिउकुमारी अनुहारमा लगाएर १०-१५ मिनट राख्ने। सुकेपछि हात भिजाएर विस्तारै मसाज गर्ने। करिब पाँच मिनट मसाज गरेपछि सफा चिसोपानीले पखाल्ने। यो दैनिक दुईपटक गर्नुपर्छ। यसले अनुहारको चाया हटाउन मद्दत मिल्छ।
– अनुहार मज्जाले धुने वा क्लिन्जिङ गर्ने। पुदिनाको पेस्टमा घरेलु रक्सी अथवा रम दुई वा तीन थोपा राखेर घोल्ने। उक्त पेस्टलाई चाया आएको ठाउँमा प्याक लगाउने। १०-१५ मिनट राखेपछि सफा चिसोपानीले पखालेमा चाया हराउँछ।
– स्किन ओइली छ भने बेसार र कागतीको रसको पेस्ट प्याक बनाएर अनुहारमा लगाउन सकिन्छ। तर, स्किन ड्राई छ भने यो नगर्नु ठीक हुन्छ।
– दैनिक तीनपटक सफा पानीले अनुहार धोएर सनस्क्रिन क्रिम लगाएमा घामबाट जोगिन सकिन्छ। गोरो छालामा चाया-पोतो आउने सम्भावना बढी हुन्छ। यसर्थ, गोरो छाला भएकाहरू घामबाट जोगिनुपर्छ। बाहिर निस्किनुअघि पेग्मेन्टेसन क्रिम लगाएपछि मात्र अन्य क्रिम लगाउनुपर्छ।
– यसरी घरेलु उपचारबाट अनुहारमा आएको चाया-पोतो साइड इफेक्टबिनै हटाउन सकिन्छ। उपचारले मात्र चाया-पोतो हट्न असम्भव हुन सक्छ। यसर्थ, सकेसम्म तनाव व्यवस्थापन गर्नुपर्छ।
यस्तै, घामबाट बच्न तथा पानी धेरै पिउन जरुरी छ। त्यसैगरी, ताजा फलफूल, सागसब्जी र सन्तुलित खानाका साथै व्यायाम र सकारात्मक सोच पनि राख्नुपर्छ।
