बाँके\नेपाल रेडक्रस सोसाइटी बाँकेले भेरी अस्पताललाई प्रजनन् सम्वन्धि औषधि हस्तान्तरण गरेको छ । जिल्ला प्रशासन कार्यालयसँगको समन्वयमा रेडक्रसले करिव ६ लाख मूल्य बराबरको प्रजनन् सम्बन्धि औषधि हस्तान्तरण गरेको नेपाल रेडक्रस केन्द्रीय कार्यालयका कार्यक्रम संयोजक नगेन्द्र अर्यालले जानकारी दिए ।
संयुक्त राष्ट्र संघीय जनसंख्या कोषको आर्थिक सहयोगमा आपतकालीन अवस्थाको लागि व्यवस्थापन गरिएका औषधिमध्ये शुक्रवार हस्तान्तरण गरिएका औषधि भेरी अस्पतालको आसीएमसी र प्रसूति विभागका लागि उपयोगि हुने अस्पतालले जनाएको छ ।
बाँकेका प्रमुख जिल्ला अधिकारी सूर्यबहादुर खत्रीले अस्पताल विकास समितिका अध्यक्ष सकिल अहमद जसगढलाई हस्तान्तरण गरेका हुन् । त्यसक्रममा प्रमुख जिल्ला अधिकारी खत्रीले प्रजनन् स्वास्थ्यका लागि आवश्यक औषधि उपलब्ध गराएकोप्रति नेपाल रेडक्रस सोसाइटी र संयुक्त राष्ट्र संघीय जनसंख्या कोषलाई धन्यवाद दिँदै त्यसको सहि सदुपयोग गर्न अस्पताल प्रशासनलाई निर्देशन दिए ।
उक्त कार्यक्रममा सदस्य कृष्णप्रसाद श्रेष्ठ र अस्पतालका प्रमुख मेडिकल सुपरिन्टेन्डेन्ट डा बद्री चापागाई, संयुक्त राष्ट्र संघीय जनसंख्या कोष मानवीय सेवा कार्यक्रमका संयोजक हरि कार्की, रेडक्रसकर्मी लगायतको सहभागिता रहेको थियो ।
रेडक्रसले कोषसँगको आर्थिक सहयोगमा बर्दिया र कैलालीमा मौसम पूर्वानुमान अग्रिम सहायता कार्यक्रम अन्तर्गत प्रजनन् उमेरका करिव ८ हजार महिलाहरुलाई मर्यादा सामग्री वितरण शुरु गरिएको छ । कर्णाली नदीबाट प्रभावित ति महिलाहरुलाई ३ हजार ५ सय मूल्य बराबरको मर्यादा सामग्री वितरण शुरु गरिएको रेडक्रसका कार्यक्रम संयोजक अर्यालले बताए ।
