कोहलपुर,बाँके: बाँकेको कोहलपुरमा जारि सुशील कोइराला मेमोरियल अन्डर १९ राष्ट्रिय टि ट्वान्टी प्रतियोगिताको उपाधि सुदूरपश्चिम प्रदेशले चुम्न सफल भएको छ । बाँकेको कोहलपुर नगरपालिकाले आयोजना गरेको प्रतियोगिताको फाइनलमा सुदूरपश्चिमले कोहलपुर मेयर – ११ लाई २ विकेटले पराजित गरेसंगै सुदूरपश्चिम बाजिगर बनेको हो ।

कोहलपुर क्रिकेट रंगशालामा सम्पन्न फाइनल खेलमा कोहलपुर मेयर -११ ले दिएको १०३ रनको लक्ष्य सुदूरपश्चिमले ८ विकेट गुमाएर अन्तिम बलमा भेटायो। अन्तिम बलमा १ रन आवस्यक हुँदा हिसिला खड्काले चौका प्रहार गर्दै सुदूरपश्चिमलाई जित दिलाउन सफल भएकी हुन ।

सुदूरपश्चिमको लागि ओपनर मनिषा बोहराले सर्वाधिक ४१ रन योगदान दिईन्। प्लेयर अफ द म्याच घोषित बोहराले ४१ बलमा ५ चौका प्रहार गरिन्। कप्तान स्नेहा महराले १६ रन, निलम पाण्डेले ९ रन, रबिना साउद र अनु कडायतले समान ८ रन तथा हिसिला खड्काले अविजित ६ रन बनाईन्।

यस अघि टस जितेर ब्याटिंग गरेको कोहलपुर मेयर -११ ले निर्धारित २० ओभरमा ५ विकेट गुमाएर १०२ रन बनायो। कोहलपुरको लागि कप्तान सना प्रविनले सर्वाधिक ४१ रन योगदान दिईन्। ओपनिंग ब्याटिंग गर्दै अविजित रहँदै प्रविनले ५४ बलमा ३ चौका मद्दतले ४१ रन बनाईन्। रिया शर्माले अविजित १४ तथा तृष्णा विश्वकर्माले १२ रन बनाईन्।

सुदूरपश्चिमको बलिंगमा अनु कडायत र स्नेहा महराले २ -२ विकेट लिए। अनुले ४ ओभरमा २८ रन तथा स्नेहाले ४ ओभरमा १ मेडन गर्दै ८ रन खर्चिन्।

उपाधि सहित सुदूरपश्चिम प्रदेशले एक लाख रुपैयाँको पुरस्कार राशि हात पार्न सफल भएको छ। उपविजेता कोहलपुर मेयर -११ ले पचास हजार रुपैयाँमा चित्त बुझाउनु पारेको आयोजकले बताएको छ । प्रतियोगिताकै उत्कृस्ट खेलाडी कोहलपुर मेयर -११ कि कप्तान सना प्रविन घोषित भईन् उनलाई रु १५ हजार रुपैयाँ पुरस्कार स्वरुप प्रदान गरियो । उत्कृस्ट बलर गण्डकी प्रदेशकि रचना चौधरी तथा उत्कृस्ट ब्याटर कोहलपुर मेयर – ११ कि सना प्रविन घोषित भईन् उनीहरुले समान ५ हजार रुपैयाँ पुरस्कार प्राप्त गरे। यस्तै उदयमान प्रतिभा सुदूरपश्चिम प्रदेशकि सावित्री धामी घोषित भईन्।

समापन समारोहका प्रमुख अतिथि नेपाल क्रिकेट संघका अध्यक्ष चतुर बहादुर चन्द तथा कोहलपुर नगरपालिका प्रमुख पूर्ण प्रशाद आचार्य, उपप्रमुख संगीता सुवेदीले विजेता खेलाडीहरुलाई पुरस्कार वितरण गरे ।

६ दिन चलेको प्रतियोगितामा कोहलपुर मेयर ११, बागमती प्रदेश, गण्डकी प्रदेश, सुदूरपश्चिम प्रदेश र लुम्बिनी प्रदेशको सहभागिता रहेको थियो।

फोटो :संजय मण्डल/ न्युज मानसरोवर डट कम