कोहलपुर,बाँके: बाँके ट्राफिकले सडक दुर्घटनालाई न्यूनीकरण गर्नका लागि बुधवारदेखि नेपालगञ्ज–कोहलपुर सडकखण्ड क्षेत्रका सडकमा ‘राडर गन’ सहित चेकिङ सुरु गरेको छ । चाडपर्वका बेला सवारी दुर्घटनामध्ये अधिकांश तीव्र गतिका कारण हुने देखिएकाले दुर्घटना न्यूनीकरणका लागि राडर गनको सहायताले चेकजाँच सुरु गरिएको जिल्ला ट्राफिक प्रहरी कार्यालय बाँकेका प्रमुख प्रहरी निरीक्षक पुष्कर पन्तले जानकारी दिए ।

सवारीसाधनका चालकलाई पहिलो पटक नियमअनुसार सवारीसाधन चलाउन सचेत पारिएको पन्तले बताए । गनापुरमा भएको सवारी चेकजाँचमा प्रहरी निरीक्षक पन्त आफै खटिएर नियमअनुसार सवारीसाधन चलाउन चालकहरुलाई सचेत बनाएको वरिष्ठ सइ प्रविण आचार्यले बताए ।

राडर गनले सवारीसाधनको गति नाप्ने काम गर्छ । यो खण्डमा स्पीड गति ५० उल्लेख गरेर वोर्ड पनि राखिएको छ । तर पनि चालकहरुले तीब्र गतिमा सवारी साधन गुडाउने गरेका छन् । जसका कारण दुर्घटनाको जोखिम बढ्ने गरेको छ । यही कुरालाई दृष्टिगत गरी ट्राफिक प्रहरीले राडर गनबाट सवारी साधनको गति नाप्ने र निश्चित गतिभन्दा बढी देखिएको कारवाही गर्ने नीति लिएको छ ।

पहिलो दिन दुई सय सवारी साधनलाई नियमाअनुसार सचेत बनाइएको बरिष्ठ सई आचार्यले बताए । चाडपर्वमा हुन सक्ने दुर्घटनाको जोखिम न्यूनीकरणका लागि ट्राफिक प्रहरीले सजगता अपनाएको प्रहरी निरीक्षक पन्तले बताए । उनले मातहतका सबै तहलाई सवारीसाधन चेकजाँचलाई कडाइ गर्न निर्देशन दिएको पनि उल्लेख गरे । चाडपर्वको वेलामा सिट क्षमता भन्दा बढी यात्रु राख्ने, तीब्र गतिमा सवारी साधन चलाउने लगायतका कारण दुर्घटना बढ्ने गर्छ ।