बाँके\एमाले अध्यक्ष केपी ओलीले कार्यकर्ताहरुलाई जनताको सेवामा समर्पित हुन निर्देशन दिएर फर्केको तेस्रो दिन कार्यकर्ताहरुले एमाले बाँके जिल्ला अध्यक्षका विरुद्ध पार्टी कार्यालयमा तालाबन्दी गरिदिएका छन् । नेकपा एमाले बाँकेका अध्यक्ष किस्मत कुमार कक्षपतीले पार्टी सदस्यता नविकरणका स्वेच्छाचारी बनेको भन्दै कार्यकर्ताहरुले जिल्ला पार्टी कार्यालयमा तालाबन्दी गरिदिएका हुन् ।
पार्टी सदस्यहरुको सदस्यता नविकरण नगरिदिएको भन्दै पार्टीको बैजनाथ गाउँपालिका कमिटीको आयोजनामा मङ्गलबार तालाबन्दी गरिएको हो । जिल्ला कार्यालयमा नविकरणका लागि विवरणसहित फायल पठाइएको भएपनि नविकरण नगरिदिएपछि तालाबन्दी गरिएको एमाले लुम्बिनी प्रदेश कमिटी सदस्य घननाथ खनालले बताए ।
बैजनाथ गाउँपालिका कमिटीका तर्फबाट एकहजार १४ जनाको पार्टी सदस्यता पार्टीको बिधान अनुसार नविकरण गर्न जिल्ला पार्टी कार्यालयमा सम्पूर्ण विवरण सहित बुझाउँदा समेत पार्टी सदस्यता नविकरण गर्न पार्टी नेतृत्वले बेवास्ता गरेकाले तालाबन्दी गर्नु परेको खनालले बताए । ‘पार्टी सदस्यता जस्तो महत्वपूर्ण विषयमा पार्टी अध्यक्ष कक्षपतीले बेवास्ता गर्ने, फोन समेत नउठाउने र बैठक नबसाल्ने भएपछि ताला लगाउन बाध्य भयौं ।’ खनालले भने ।
अर्का प्रदेश कमिटी सदस्य मानबहादुर रुचालले पार्टी केन्द्रले जिल्ला कमिटीबाट साउन १५ गते सम्म सदस्यता नविकरण गरिसक्नु पर्ने निर्देशिका जारी भएपनि १५ गतेका दिन अध्यक्ष पार्टी कार्यालयमै उपस्थित नभएपछि १ हजार बढी सदस्यहरुको सदस्यता अन्यौलमा परेको बताए । कमिटीका अध्यक्ष इन्द्रबहादुर थापाको अगुवाईमा भएको तालाबन्दीमा प्रदेश कमिटीका सदस्यहरु घननाथ खनाल, मानबहादुर रुचाल, नन्द बिश्वकर्मा लगायतका अगुवा नेता कार्यकर्ताको सहभागिता रहेको थियो । पालिका कमिटीले पार्टी सदस्यता नविकरण गर्न पाउने अधिकारमाथि पार्टी जिल्ला अध्यक्ष कक्षपतिले बञ्चित गरेको स्थानीय नेताहरुको आरोप छ ।
