कोहलपुर,बाँके: मालदिभ्सको मालेमा सुरु काभा यू–२० महिला भलिबल च्याम्पियसिपमा नेपाली महिला टोली पहिलो खेलमा पराजित भएको छ। बिहीबार राति मालेस्थित सोसल सेन्टरमा भएको खेलमा नेपाली युवा टोली श्रीलंकासँग ३–१ को सेटमा पराजित भएको हो।
पहिलो सेट २०–२५ ले गुमाएको नेपालले प्रतिस्पर्धात्मक दोस्रो सेट भने २६–२४ ले आफ्नो पक्षमा पार्न सफल भयो। तर तेस्रो सेटमा कमजोर प्रर्दशन गरेको महिला टोलीले ११–२५ को नतिजा श्रीलंकालाई सुम्पेको हो। चौथो तथा निर्णायक सेटमा नेपालले १८–२५ ले गुमायो।
नेपालले दोस्रो खेलमा उपाधि दाबेदार किर्गिस्तानविरुद्ध खेल्नेछ। अब राउण्ड रोविनको अन्तिम खेलमा शनिबार घरेलु टोली मालदिभ्सविरुद्ध खेल्नेछ। आजै भएको पहिलो खेलमा किर्गिस्तानले आयोजक मालदिभ्सलाई सोझो सेटमा पराजित गर्दै च्याम्पियनसिपमा सुखद सुरुवात गरेको छ।
राउण्ड रोविनपछि लिगको शीर्ष र चौथो स्थानमा रहने टोली तथा दोस्रो र तेस्रो स्थानमा रहने टोलीले सेमिफाइनल खेल्नेछन्। सेमिफाइनल खेल सोमबार हुनेछ। सेमिफाइनलको विजेताले फाइनल खेल्नेछन्। पराजित हुने टोलीले भने तेस्रो स्थानका लागि खेल्नेछन्। फाइनल र तेस्रो स्थानका लागि खेल मंगलबार हुनेछ।
