विशेषगरी आज रातिदेखि वर्षाको मात्रा र क्षेत्र झनै विस्तार हुने पूर्वानुमान गरिएको छ। रातिको समयमा कोशीका धेरै स्थान र अन्य तीन प्रदेशका केही स्थानमा वर्षा हुनेछ भने कोशी र गण्डकीका पहाडी तथा हिमाली क्षेत्रका एक-दुई स्थानमा भारी वर्षा र हिमपातको समेत जोखिम रहेको विभागले जनाएको छ । यसपटकको वर्षाका कारण साना खोला खोल्सीहरूमा आकस्मिक बाढी आउने, पहाडी क्षेत्रमा पहिरो जानसक्ने र सडक अवरुद्ध हुनसक्ने भएकाले उच्च सतर्कता अपनाउन विभागले आग्रह गरेको छ ।

मौसमविद उज्ज्वल उपाध्यायले वर्षाको प्रभावका कारण त्रिभुवन राजमार्ग, पृथ्वी राजमार्ग, सिद्धार्थ, पासाङल्हामु र बीपी राजमार्गमा मंगलबारदेखि बिहीबारसम्म रातिको समयमा यात्रा नगर्न सुझाव दिएका छन् । उनका अनुसार काठमाडौं उपत्यकालगायत वरिपरिका क्षेत्रमा पनि आज बेलुकी र अलिराति ठूलो वर्षा हुने सम्भावना छ ।