बुटवल- लुम्बिनी प्रदेशसभाका सभामुख पूर्णबहादुर घर्तीले संसदमा दर्ता भएको सञ्चारसम्बन्धी विधेयक मिडियामैत्री बनाउने सवालमा आफूहरुको ध्यानआर्कष्ण भएको बताएका छन्। उनले प्रेससम्बन्धी कानुन निर्माणमा पत्रकारहरुको सुझावलाई मनन गरिने बताए।
प्रेस संगठन नेपाल रुपन्देहीले सोमबार बुटवलमा आयोजना गरेको तीज विशेष तथा बधाई ज्ञापन कार्यक्रमलाई सम्बोधन गर्दै सभामुख घर्तीले यसअघि पनि पत्रकारहरुको सुझाव अनुसार नै काम गरिएको बताए। ‘पत्रकारहरुको सुझावलाई मनन गरेर कानुन निर्माण गरिनेछ’ उनले भने। उनले सञ्चारमाध्यम आफैँ पनि समस्यामा रहेको बताउँदै अब प्राविधिक रुपमासमेत आफूलाई समयानकुल बनाउनुपर्ने बताए।
तीजका सन्दर्भमा आयोजना गरिएको उक्त कार्यक्रममा सभामुख घर्तीले चाडपर्व समयानुकल परिवर्तन हुनुपर्ने तर, परिवारलाई लाज लाग्ने खालका प्रवृत्तिलाई संस्कार भने बनाउन नहुने उनको भनाइ छ । कार्यक्रममा लुम्बिनी प्रदेशका अर्थ तथा आन्तरिक व्यवस्था मन्त्री कृष्णध्वज खड्काले संस्कृतिहरू समय अनुसार बदलिँदै जाने भएकोले त्यसलाई बैज्ञानिक बाटोतर्फ मोड्नुपर्नेमा जोड दिए।
कार्यक्रममा बोल्ने क्रममा संविधानसभा सदस्य विनोद पहाडी, पत्रकार डा. बालकृष्ण चापागाईं, पत्रकार महासंघ लुम्बिनी प्रदेश अध्यक्ष वसन्त गिरि, रुपन्देही अध्यक्ष रामराज पोखरेल पोखरेल, प्रेस संगठन रुपन्देहीका अध्यक्ष कमल रायमाझीले सञ्चारमाध्यम सम्बन्धी विधेयक नसच्चाए आन्दोलनमा उत्रने चेतावनी दिएका थिए।
