नेपालगन्ज: प्रहरी चेकजाँचका क्रममा बरामद गरेर बर्षौदेखि प्रहरी कार्यालयमा थन्काइएका सवारी साधनलाई बाँके प्रहरीले लिलामी गर्ने भएको छ । जिल्ला प्रहरी कार्यालय सहित बिभिन्न प्रहरीका युनिटहरुमा थन्काइएका १ सय ४० थान सवारी साधनलाई बाँके प्रहरीले लिलामी गर्ने भएको हो ।
जिल्ला प्रहरी तथा मातहतका प्रहरी इकाईहरुमा रहेका विभिन्न समयमा विविध कारणले नियन्त्रणमा लिइएका स्वामित्व नखुलेका तथा कागजपत्र नभेटिएका पुराना सवारी साधनहरुको लिलामी प्रक्रिया अगाडी बढाइएको जिल्ला प्रहरी कार्यालय बाँकेका प्रहरी निरीक्षक निरञ्जन घिमिरेले बताए । उनले कानुनी प्रक्रिया पुरा व्यवस्थापन गर्नुपर्ने भएकोले लिलाम सूचना प्रकाशित गरी प्रक्रिया अगाडी बढाएको जानकारी दिए । घिमिरेका अनुसार सरकारी सम्पत्ति तथा जिन्सी मालसामान लिलाम बिक्री सम्बन्धी कार्यविधि २०७९ को परिच्छेद ३ को दफा २० बमोजिम लिलाम बिक्री प्रक्रिया थालिएको हो ।
माघ २५ गतेदेखि लागू हुनेगरी १५ दिने लिलाम बिक्रीको सार्वजनिक सूचना प्रकाशित गरिएको बाँके प्रहरीले जनाएको छ । बाँके प्रहरीका विभिन्न इकाईहरुमा समयसमयमा बरामद गरिएका सयौं मोटरसाइकलहरु कवार्ड बन्ने अवस्थामा पुगेका छन् ।
