३१ जेष्ठ २०८१, बिहीबार

अझै तीन दिन सम्म तातो हावा चल्ने आकलन, प्रशस्त कागती पानी पिउन सुझाव
  • न्युज मानसराेवर

कोहलपुर,बाँके: बाँके लगाएत पश्चिम नेपालका तराईका जिल्लाहरुमा अझै तीन दिन सम्म तातो हावा अर्थात लु चल्ने आँकलन गरिएपछि चिकित्सकहरुले लुवाट बच्न प्रशस्त मात्रामा कागती पानी पिउन सुझाव दिएका छन । तापक्रम बढेसँगै सामान्यदेखि जटिल खालका स्वास्थ्य समस्या देखिने हुँदा सचेत रहन चिकित्सकहरुले यस्तो सुझाव दिएका हुन ।

नेपाल सरकार स्वास्थ्य तथा जनसङ्ख्या मन्त्रालयका वरिष्ठ स्वास्थ्य प्रशासक डा.समीरकुमार अधिकारीले तापक्रम बढ्दा थकाई लाग्ने, कमजोरी हुने, तिर्खा लाग्ने, टाउको दुख्ने, खुट्टा बाउँडिने, चक्र आउने, बेहोस हुने, मांसपेशी दुख्ने, वान्ता हुने, झाडापखाला लाग्ने जस्ता स्वास्थ्य समस्या देखिने हुँदा सचेत रहन आग्रह गरेका छन ।

तातो हावा ‘लू’ ले बालबालिका, वृद्धवृद्धा तथा दीर्घरोगीलाई बढी असर गर्ने हुँदा विशेष ध्यान दिन डा.अधिकारीको आग्रह छ ।

डा. अधिकारीका अनुसार तातो हावाबाट बच्न प्रशस्त मात्रामा पानी पिउन, बाहिर निस्कनै परे छाता ओड्ने वा पातलो कपडाले टाउको छोप्ने, हल्का खालको शीतल हुने कपडा लगाउन, चिसो पानीले नुहाउन, खेतबारीमा वा घर बाहिर काम गर्दा बिहान वा बेलुका गर्ने, कागती पानी, नरिवल पानी तथा फलफूलको रस पिउने, फलफूल काँक्रो लगायत घरमै बनाएको ताजा खानेकुरा खाने गर्नुपर्छ ।

दिउँसो सकभर घर बाहिर ननिस्कन, क्याफिनले धेरै पिसाब गराउने हुँदा चिया कफी, सोडा जस्ता पेयपदार्थ नपिउन, धूम्रपान तथा मदिरा सेवन नगर्न उनको अनुरोध छ ।

डा.अधिकारीकारीले तातो हावाले मुटुको चल तीव्र हुने, श्वासप्रश्वासमा समस्या हुने रक्तचाप कम हुजे शरीरबाट पसिना ननिसकने, टाउको अत्यधिक दुःखने, चक्सर लाग्ने, हनहनी ज्वरो आउने जस्ता समस्या देखिए बिरामीलाई तुरुन्त अस्पतालमा लैजान समेत सुझाव दिएका छन ।

 

  • २९ जेष्ठ २०८१, मंगलवार प्रकाशित

  • Nabintech